Eleven天生聽障但無阻唱歌?《Stranger Things》6大童星逐個捉

by 二弟

各位煲劇姊妹,Netflix美劇《Stranger Things》你睇咗未?平日啲港劇唔係爭產估卧底,就係膠劇,而美劇好多都係打打殺殺,好彩《Stranger Things》就有返啲細路戲,少少緊張之餘,而且啲童星又好鬼得意,個個都好戲又好睇,睇嚟之後都係睇佢地!而家就介紹第二季嘅6大童星,等你認住佢哋啲名啦!


Millie Bobby Brown

Eleven實在太型喇,真名叫Millie Bobby Brown嘅佢,2004年喺西班牙出世,英國長大,今年只係13歲!想當初佢接咗呢套劇果陣,唔知要剪頭髮剪到咁短,阿媽反應超大,最後佢反而要安慰阿媽。結果頭髮生番出嚟,人氣仲接踵而嚟,受到各大時裝品牌招徠,之前就去過Fashion Show、成為外國MV女主角、上各大清談電視節目,仲有傳佢過百萬美金接拍大片《哥斯拉》續集,仲有得分紅添!特別一提,佢天生有聽障,其中一邊耳嘅聽覺盡失,但無阻佢唱歌嘅熱誠,仲好鍾意唱歌添,加油呀Eleven!

 

 

Finn Wolfhard

喺劇集入面同Eleven好登對嘅Mike,今年15歲嘅Finn Wolfhard,除咗係A.V. Club入面Party嘅大佬之外,查實係一個演員,之前喺《小丑回魂》入面好多野講多搶鏡,同時佢仲係結他高手,曾經上台夾band彈punk,又曾經幫加拿大樂隊PUP拍音樂MV拍攝做主音嘅年青版。聽講,因為呢條片YouTube點擊率超高,個個網友都讚佢演得好出色,結果贏到《Stranger Things》Mike呢個角色喎!

 

 

Noah Schnapp

咁多個童星之中,我覺得阿Will最慘,第一季成日一個人演戲,第二季仲成日發癲咁,但係Noah Schnapp可能係繼Eleven第二個上位嘅童星。之前已經喺大導演史提芬史匹堡電影《換諜者》飾演湯漢斯的兒子,亦曾經幫《Snoopy》電影同遊戲入面嘅Charlie Brown配音。

最近佢仲擺脫埋佢班朋友仔,一個人登上男性時裝雜誌《 L'OFFICIEL HOMMES》11月號封面,著住GUCCI 18 早春系列,同時仲有好多個唔同造型,同佢喺劇集入面好唔同,睇嚟上位有望,不容忽視。

 

 

Gaten Matarazzo

Cap帽崩牙仔Dustin可以話係《Stranger Things》最令人又愛又恨嘅角色,佢繼續係溝唔到女之餘,今集仲爭啲用nougat養隻四腳爬爬,累死自己同埋同伴。但原來飾演呢個角色嘅Gaten Matarazzo,正正係畀劇組第一個決定用佢嘅人,而且佢喺劇集以外,除咗拍過時裝廣告之餘,仲有份唱歌,模仿經典廣告演出,又做過百老匯舞台劇《孤星淚》嘅街頭頑皮小男孩角色,所以真正係「唱而優則演」呀!

 

 

Caleb McLaughlin

芸芸童星之中,黑仔Lucas喺第一季比較無咁搶眼,但第二季多咗好多發揮演出,仲成功溝到Mad Max,譜出一段機舖情緣。Lucas原名係Caleb McLaughlin,最鍾意唔係打街機,而係玩GTA V,亦係咁多角色之中,年紀比較大嘅一位,但都只係16歲仔。正式拍劇前,佢已經踏過3年百老匯台板,飾演《獅子王》音樂劇入面嘅年輕辛巴,千祈唔好睇少佢!

 

 

Sadie Sink

今季新增嘅角色Max,又名Mad Max,真人叫Sadie Sink,喺劇集入面畀Eleven仇視,但劇集以外,原來佢同Eleven(Millie Bobby Brown)係fd子,兩家人一齊暑假去旅行架!呢位15歲小妹妹,亦都係百老匯音樂劇出身,仲扮演過年輕版嘅英女皇,成年版係由奧斯卡影后海倫米蘭主演架,嚟緊電影《玻璃城堡》都有佢架,勁呀!

 

 

延伸閱讀 >>> 同雷神有感情線!雷神新女角TESSA THOMPSON型格、性感兼備

延伸閱讀 >>> SELENA GOMEZ、JUSTIN BIEBER把臂同遊、甜笑踩單車 第N度復合?

LOAD MORE