大解救！如何擊退老闆的深夜短訊！！

唔知點解，香港都係有返工冇收工，
自從whatsapp興起，老闆會24小時隨時msg你。

正所謂深宵時份，你想樂得清靜。
但唔覆又得罪老闆，點先可以做「話題終結者」，
等老闆唔再阻住你，亦唔會得失佢呢？

1.首先，秒覆是不能的！

請緊記！回覆時間要拿捏得好準確！

一般嚟講，如果你唔想同佢糾纏落去，
頭15分鐘係「不能覆」黃金時間！ 

頭15分鐘，代表住一種「交談慾望」同「盼覆期待」，
呢段時間佢最想同你溝通。

所以你要將佢熱情冷卻！唔覆佢。

等15至30分鐘之後，佢可能會去咗沖涼，做其它嘢，熱情驟降……
睇準呢個時機！你就可以覆一句去end the topic！

你可能問？點解唔幾個鐘之後先覆，甚至扮瞓著第二朝先覆呢？
傻妹嚟嘅，呢個真係你老闆呀！幾粒鐘先覆係人都知你Hea佢啦！

總之，一小時內覆，但15至30分鐘之後先覆。

 2.千依百順一句「好！！！」

咁之後應該點覆？老闆咁夜搵得你！多數係突然有啲驚人idea（佢覺得），

想你執行或者叫你諗下（即係叫你認同）。

你可以不負責任咁「完全認同」，但文字愈少愈好。

例如「好呀！！」（記得加emoji，愈多感覺愈真誠）。

因為你唔係即覆佢，佢半個鐘之後睇到，都冇咩好討論，就唔會理你。

3.半拖半應半虛半實

就咁答「好」，有啲危險，因為等於你好同意，老闆覺得你肯做！

但最高境界，仲有一句：

「好，聽日等我同同事研一研！」

呢句意境好高。

首先，你應咗「好」，等於認同，老闆已高興。
但你加咗「聽日」，暗示佢「今日」已經過去，我係唔會做嘢的。
最後再有埋「同同事研一研」，
將同事拉落水，明明一個人嘅事變咗一team人嘅事，分散workload，
而且只係「研究階段」，未必做，有埋後路。

真係聽者高興，打字者都愈加起勁。 

 4.以退為進，超長2分鐘vocie msg絕命還擊！

如果你老闆真係超長氣，你唯有以退為進，
覆返一個超長2分鐘嘅vocie msg畀佢。

一定要係vocie msg。

因為佢搵你只係一時興起，無拿拿要聽個2分鐘msg。
人人都會拒絕，所以佢好大機會唔聽！ 

就算聽咗，因為你認真過頭，
佢都冇晒興致。

分分鐘最後係佢同你講
「好，聽日等我同你研一研！早啲休息！」