嚟自日本九州嘅Ufufu Cafe換上新形象，喺沙田開新店，帶嚟更全面嘅西日式美食，帶超過200款菜式，包括多款意粉、足料漢堡扒、沙律、炸雞、咖喱飯、蛋包飯、鐵板燒，當然仲有唔少得嘅甜品，真係食到停唔到啊！

1. 必試芭菲系列

小編敢講呢到完全係甜品控嘅天堂，20款嘅芭菲俾大家任揀，有嚟自靜岡嘅密瓜，又有士多啤梨、芒果等，水果鮮甜好味，大多嚟自日本，好有質素架！

雪糕糯米糍朱古力芭菲 $78

2. 空氣感厚班㦸

配上密瓜嘅班㦸係人氣之選，班㦸香濃又鬆軟，加埋雪芭、cream同水果一齊食，層次豐富！

靜岡蜜瓜班㦸 $168

3. 抹茶系列

抹茶甜品都有成20多款，帶熱茶、凍飲、抹茶意大利芝士餅同埋抹茶心太軟芭菲（推介！），完全被抹茶包圍啊！

令人好似置身京都嘅抹茶意大利芝士餅配福岡八女抹茶（$88），仲有得沖抹茶飲，好滿足架！

4. 日本人氣三文治

呢款鮮果三文治就夠晒特別喇，唔好睇佢個樣普普通通，其實食落好好味，唔怪得日本人咁鍾意，三文治夾住粒粒果肉，加埋超幼滑嘅cream，食多幾件都無問題！

水果三文治 $58 

 呢件好似油炸鬼嘅法式吐司，都係食過會大讚嘅甜品，吐司外脆內軟，配埋凍冰冰嘅雪糕、cream、蜜糖，食落啖啖幸福感啊！

UFUFU法式吐司 $68

5. 和風松葉蟹牛油意粉

必試嘅有呢個和風松葉蟹牛油意粉，選用超過一尺長嘅珍寶松葉蟹腳，味道鮮甜又啖啖肉！（$198）

同場仲有好多和風生意粉同烏冬系列，包捨有水菜大蝦羅勒忌廉汁意粉、牛肉壽喜燒烏東、和風松葉蟹牛油意粉、白芝士咖哩炸雞讚岐烏冬，及選用九州熊本蕃茄嘅厚切煙肉蕃茄卡邦尼意粉。

白芝士咖哩炸雞讚岐烏冬 $88

6. 期間限定 Jum-burger 珍寶和牛漢堡扒

漢堡扒每塊足500克，配上芝士、鮮茄醬、磨菇同燒汁，每日於晚市供應，只限10食，可另配野菜沙律、焗酥皮栗米湯同新潟米白飯。

7. 日式蛋包飯

西日式飯類選擇一應俱全，圖中包括日式蛋包飯系列、和風丼系列及用上10小時自家炮製日式咖哩系列。

8. 鐵板燒和牛

鹿兒島和牛鐵板燒系列，可另配野菜沙律、焗酥皮栗米湯及新潟米白飯，包括有鹿兒島和牛漢堡扒、流心芝士和牛漢堡扒。

9. 美味小食

和風小食及野菜沙律系列都有好多選擇，包括有脆炸烏賊、九州風炸雞翼、櫻花蝦豆腐沙律拌胡麻汁、黑松露忌廉可樂餅，同埋Ufufu滑蛋沙律。

手製餃子雞翼（芝士1隻、明太子1隻）$48

10. 開心兒童餐

精緻嘅兒童餐備有多款活潑造型，而且食物多元化，小朋友一齊嚟食都無問題！

L.D.K. by Ufufu Café
地址：沙田新城市廣場一期1樓115號舖
電話：3586 2997
營業時間：11am-11pm
地址：葵芳新都會廣場 3樓 354A號舖　（預計 11 月 18 日試業)
電話：3586 3899