【降魔的】御用大台賤男,由茄喱啡上C1再到男主角?速睇黃子恆點樣上位

by 二弟

黃子恆個名,娛樂版成日都見;黃子恆個樣,電視機成日都見,但做親都係男配角,御用賤男。

只不過,裕美同佢被揭發有婚外情,佢再三承認自己唔知對方結咗婚,人氣竟然急升,今年更加係豐收一年,入行18年一直做男配角嘅佢,今年至少兩套都有重要戲份,更加勁到榮升男二,究竟黃子恆係何方神聖?即刻用放大鏡睇一睇黃子恆上位記。

入行18年

睇番黃子恆嘅資料,原來今年只係35歲,早喺99年已經入咗TVB藝員訓練班,只可惜同屆同學有馬國明、吳卓羲等等,但都叫好彩,初時被安排做《都市閒情》主持,一度係下午時段嘅「師奶殺手」,至於拍劇就慘啲,咁多年都係做閒角或茄喱啡為主!

 

有份《衝上雲霄》

做閒角唔緊要,最重要做個有用嘅閒角。想當年《衝上雲霄》Season 1(真係想當年嘅事),黃子恆有份飾演一個二副機長阿Nick嘅角色,你又點會估到,十年後竟然可以連戲,仲拍住胡定欣先得架,當然果時都未算最衝上雲霄,只不過《衝上雲霄》果一代,黃宗澤、吳卓羲、陳鍵鋒、蔡淇俊走得嘅走,叫做剩番馬明同黃嘉樂,所以黃子恆上位都係時候嘅!

 

緋聞超多

或者你以為黃子恆竟然揀裕美咁冇taste,但睇番佢做閒角嘅歷史,其實傳緋聞嘅都唔少,分別同陳茵媺、胡定欣、陳瀅、陳敏之、林夏薇飾演過情侶,有啲仲有激吻情節,有冇擦出真火花就唔知喇,但其中兩個傳緋聞傳得幾勁,包括同李佳芯被拍到蜜遊西貢,撐枱腳燭光晚餐兼去到男方屋企過夜;另一單就係同吳若希夜遊赤柱,兩個都心有所屬,希望唔係真啦。

 

水晶改運

桃花運超多,喺娛樂圈可能係好事,其後有人發現,原來黃子恆阿媽有份幫手。雖說起底講人屋企唔係幾好,但今次唔係講佢阿媽壞話,反而係幫佢賣下廣告。據講佢阿媽係紮根紅磡多年嘅算命師,精通紫微斗數、占卜、改名等,其中最擅長水晶改運,仲會開班授徒,同埋賣水晶風水擺設。你話阿媽無幫阿仔催旺桃花,我就唔信喇!

 

今年上位

除咗桃花運,睇嚟事業運都有催旺過!沉寂多年,多得C1裕美帶挈之後,人氣我取,今年劇集《味想天開》榮登第二男主角,《降魔的》就係第三男主角,但魔警上身非常好戲,計埋今年仲有《乘勝狙擊》、《踩過界》同人人有份演出嘅《誇世代》,睇嚟早兩年因為《四個女仔三個BAR》、《收規華》提名過「飛躍進步男藝員」同「最佳男配角」,今年終於有機會爭下獎,甚至可以一嚐視帝提名!

 

延伸閱讀 >>> 天然呆演活麻甩的士佬!馬國明憑《降魔的》發圍 擺脫膠劇男主命運?

延伸閱讀 >>> 交換伴侶?SELENA同JB復合 THE WEEKEND搭上JB舊愛

LOAD MORE