超人爆肌,蝙蝠俠超豪,閃電俠勁搞笑!《正義聯盟》邊個英雄最啱你心水?

by 二弟

呢期電影最爆,應該係《正義聯盟》啦,陪咗男友/老公入場未?《正義聯盟》今次all in,一共有6個superhero,分別係超人、蝙蝠俠、神奇女俠、閃電俠、水行俠同鋼骨,6個英雄6種特質,就好似揀伴侶咁,總有一款啱你心水,right?

超人=博愛爆肌筋肉男

《正義聯盟》有超人咩?冇錯,中段死而復生,至於點解復活,唔需要深究,正如TVB續集一樣,唔係孖生兄弟姊妹就OK。冇見一排,超人又大隻咗,如果去肯幫手出樣喺港鐵賣豐胸廣告,相信好多姊妹都會仆到去幫襯。超人正正係肌肉男嘅代表人物,提供最貼身嘅呵護兼保護,只可惜四肢發達頭腦簡單,而且好博愛,保護地球所有人,唔能夠獨享。

 

蝙蝠俠=超有錢Super Daddy

呢幾年嘅蝙蝠俠,老咗、樣衰咗,不過呢個Super Daddy堅係Super有錢,難怪今集有個Superhero問蝙蝠俠有乜超能力,佢都好坦白話,我嘅超能力就係超有錢。慢慢諗,Superhero淨係識保護你有鬼用咩,平日有幾可要你保護,而家咁嘅時勢,有錢就係最好打,幾多武功高手都要輸畀你啦,係咪咁話?

 

水行俠=水潤粗獷大男人

 

入水能游,出水能跳,就係水行俠Aquaman嘅超能力。貌似徐錦江嘅Aquaman,同雷神一樣,玩裸露粗獷,大男人本色,惹火又大佬feel,其實都幾冧女,只可惜時不在佢,呢集打地面戰多,無乜機會畀呢位亞特蘭蒂斯後人表演,下年獨立大電影再發揮下啦。

 

閃電俠=搞笑爽快後生仔

 

有人鍾意Super Daddy,亦有人鍾意Super Junior,今次閃電俠就係junior嘅代表,負責搞笑。基本上佢唔識得打,但係天下武功無堅不摧唯快不破,佢堅係爽快,擋子彈無難度,唔駛識打只係救人都已經好叻叻,又搞笑又夠快又後生,姊妹們肯定爽到爆。

 

鋼骨=實而不華IT狗

 

老老實實,鋼骨好悶,唔係好講笑,又剩係識科技嘢,十足十IT狗,但每間公司都要有IT部門,實而不華呀,總會有人鍾意,而且其實講入侵侵侵嘅實力,佢先至係大佬,冇佢點搞掂個母盒呀?

 

神奇女俠=姊妹另類選擇

 

 

嗱,你睇番第一段,我係講揀伴侶,而唔係揀男人。姊妹們咁熟男人,都知道男人好賤好麻煩,有時都係女人好。神奇女俠就連女人都吸引到,完美化身,上面果埋超級英雄都揀唔落嘅話,不妨考慮下神奇女俠啦。

 

 

延伸閱讀 >>> GAL GADOT拒與涉性侵監製合作 揚言辭演《WONDER WOMAN 2》

延伸閱讀 >>> 明日之星EZRA MILLER你要識!佢係「閃電俠」,又係《怪獸與牠們的產地》菇頭男

LOAD MORE