原來Wonder Woman係大婆小三混合體?《佔·誘神奇女俠》話你知呢段暗黑歷史

by 二弟

 

DC《正義聯盟》大堆頭登場,不過同之前預料一樣,都係Wonder Woman搶晒鏡啦!與此同時,《佔·誘神奇女俠》下星期上映,到底又係咩事?原來係講最元祖級《神奇女俠》漫畫嘅暗黑誕生歷史,仲話你知,Wonder Woman正正係集「神奇女俠之父」身邊兩個女人(大婆同小三)嘅混合體化身。喂呀,好癡線呀!

 

 

聰明、強悍、女權=大婆?

 

「神奇女俠之父」Professor Marston,哈佛畢業,精通法律之餘,又有心理學博士學位,讀大學時已經識得才女Elizabeth後結婚。點解係才女?上世紀20年代已經有心理學、法律雙學位,喺男女超級不平等嘅當年,絕對係異數。所以,Wonder Woman嘅聰明才智、強悍、不服輸,好大程度來自大婆Elizabeth。

 

純情、可愛、溫柔=小三?

 

好好嘅男才女貌,突然喺Marston教書、Elizabeth做助教期間,出現咗來自女權世家嘅女學生Olive Byrne。學生妹求知慾強,經常留堂幫Professor做研究,純情可愛又溫柔,男人犯賤貪後生妹,唔難估到。最癲係,就連Elizabeth一樣睇中Olive,更癲係,兩公婆竟然大膽向學生妹示愛,更提出兩女共侍一夫,三公婆同一屋簷下,更更癲係,學生妹應承呀!於是,Wonder Woman又有生於天堂島而不知世界運作嘅合理無知,同時又有不一樣嘅溫柔可愛,完全係小三Olive而影響。

 

永不言敗、女權至上=Marston?

 

你以為一間屋有兩個老婆,果個老公就係大男人?錯!Marston向來深信女人比男人優秀,極為欣賞女性特質,甚至提倡由女性主導嘅社會。為咗宣揚呢個為世不容嘅觀點,佢決定用筆名Charles Moulton創造「神奇女俠」呢個角色,用漫畫包裝,當中有女權思想之餘,當然仲有好多同佢三公婆有關嘅性元素,甚至性暴力情節,不斷被當時道德委員會阻止,但佢見招拆招,永不言敗,暗地裡,其實佢咪又係Wonder Woman嘅其中一部分性格囉!

 

「武器篇」:真言套索=SM?

 

Wonder Woman能力之高,隨身都有唔同武器或者防具,其中一件常見嘅,就係令人講真話嘅Lasso of Truth(真言套索),其實呢樣就係反映番Marston嘅真實人生,因為佢同時亦係「測謊機之父」,想當初佢地三男女互相測試對方有冇愛意,講唔到大話之餘,仲變成互相表白,之後就名正言順變為Wonder Woman嘅一大殺著。

 

問題係,好好地一部測謊機,點解會變做套索,有暴力甚至SM意味?冇錯,就係SM。電影中就有提到,Marston就帶過兩個女人去當時嘅禁區,門面係賣內衣賣服裝造型嘅舖頭,門後就教人點樣閨房玩繩索SM,其中一幕仲係小三被紮起⋯⋯你又點會諗到,Wonder Woman竟然係SM始祖?

LOAD MORE