唔熟朋友派紅色炸彈畀你!去唔去好?

by 新婚由紀

 

去到一個年紀,
每個月至少去飲一次。

當中有啲係超好朋友、有啲係職場戰友、有啲係親朋戚友。
以上都冇需多講,去得就去啦。

 

但有一類,係好難決擇,
就係「你識佢,但唔熟,甚至多年冇見,但佢話想派帖畀你」。

呢個時候,點搞好呢?

請正反雙方,全面進場。

 

正方:請你都係一份勇氣

首先唔好講佢係咪貪你人情……其實幾年冇見,
佢都照搵你,佢都面懵嘅!

所以佢搵得你,可能真心想你見證佢最幸福時光啫。
有時間咪去囉!

 

反方:禮金數字節節上升,都要量入為出

細細個,真係邊個請都去。

但大個咗,一個月可能飲兩次。

一年飲20次……你又唔想寒酸,又怕佢哋蝕……
下下都1000、800……呢家有啲靚酒店,仲話公價已經破千。

都不得不現實啲諗,同佢個wtsapp都講唔夠100句野,
係咪仲要去呢?

 

正方:見證幸福,都係一種幸運

 

見到新人開開心心,都係一件好事呀。

始終喜事嘛,有能力咪去慶祝下,
同埋場面感人,去完個人都開心啲。

 

反方:我去,都係做佈景板啫

 

講真,新人係婚禮主角,忙到爆。

你同佢講多句嘢都畀人拉走啦。

加上,我同佢又唔係好熟,
成長片段唔關我事,佢多謝朋友都冇我份,
上台合照都尷尷尬尬,

早走又冇禮貌,生勾勾坐到十一點,
仲要交低成千銀,不了。

 

中立方:雖然唔熟,但睇下對方同自己多唔多回憶

有一次,係小學同學畀帖我。
其實小學畢業之後,就斷咗聯絡。

冇見十幾年。

但我都照去,因為小學時,我哋真係好好朋友。
雖然升學路途令我哋變成陌路人。

但小學幾年,已令佢喺我心中,有一定位置。 

我諗大家都一樣,有啲唔熟嘅人,雙方真係冇咩感情,去嚟冇意思。

但有一類朋友,係唔熟,或者已經變得陌生,但喺你心頭,始終留下一份重量,
令你想去見證佢嘅婚禮。

LOAD MORE