最萌姊妹檔﹗陸永女兒孖公仔成長誌熱爆IG,童言童語冧死人

by Rain

娛樂圈不乏星級姊妹檔,靚基因X2養眼又吸睛,但當中有一對,人氣超高,受盡矚目,而且竟然唔使靠賣靚,賣萌就得嘞。說的是農夫成員陸永兩個寶貝女Hannah(陸一穎)及Simsim(陸一心),一個五歲,一個四歲,好姊妹有影皆雙,齊齊玩齊齊瞓,家姐視爸爸為男神,細妹就唱反調話「爸爸唔靚仔」,性格大不同的兩個好姊妹為網民帶來開心又窩心的感覺。

一個似前世情人,另一個似前世債主

陸永父愛滿瀉,兩個女兒都是在爸爸呵護下成長,但即使待遇一樣,家姐Hannah與妹妹Simsim對住嗲哋的態度都大相徑庭。首先家姐就十分依戀爸爸,試過爸爸出trip去英國爆喊「好掛住嗲哋」,更會問途人:「識唔識得陸永,好靚仔⋯⋯」

前世情人的嘴臉真係出晒嚟,至於妹妹,她就會對住爸爸講:「我鍾意靚仔吖嘛,你都唔係靚仔。」如此夭心夭肺。有人話兒女係前世債主,今世投胎收番筆債,睇嚟Simsim就似係呢款,而Hannah明顯係前世小情人啦﹗

不過講到咁,其實可愛的Simsim只是較爽朗直率,坦言不喜歡爸爸只因爸爸太忙冇時間陪自己,陸太Reina就在IG呈報父女感情線最新發展,指Simsim經過一個暑假同爸爸有充分時間相處後,已改口讚爸爸好靚仔。

家姐是小少女,妹妹似小丸子

兩姊妹站在一起,高度同身型不會相差太遠,但好明顯已有性格之雛型。生得高挑的家姐Hannah只有五歲,但五官似媽媽咁標緻,都散發着少女仙氣,有小模特兒的架勢。

 

至於勁cute的Simsim整個冬菇頭真係好似小丸子,加上整天都開啟坦白講模式,對住鏡頭更是鬼馬,簡直係表情包人選。兩個站在一起,一動一靜,一個生鬼一個少女,好得意﹗

姊控Simsim對決高EQ Hannah

兩姊妹雖然性格差異大,但感情就好到糖黐豆,似足一對孖妹。尤其妹妹Simsim就是一個姊控,連農曆生日利是都要分一半給家姐,以免家姐冇份唔開心。痴纏到甚至會向家姐索抱:「俾我抱一陣得唔得?」家姐Hannah就好了解自己個妹,回應:「一陣?一陣即係好耐啦~」睇得出平日Simsim很依賴家姐。相對熱情的細妹,Hannah年紀小小已學識情緒管理之重要性,她會在紙上寫”Mommy Hannah is so angry”去代替發脾四,鬧個妹之前更會先警告她:「Simsim我就嚟發脾氣㗎啦﹗」連學校老師都讚Hannah面對同學之間的小紛爭,識忍耐唔發嬲,真係好懂事呀。

可愛童言,有嗰句講嗰句

所謂童言無忌,小朋友思想簡單又天真,有時啲說話真係真到令人啼笑皆非。好似陸家兩姊妹咁,姊姊Hannah的話好sweet好窩心,例如同媽咪的pillow talk,就話想媽媽再為家庭添一名新成員,並天真咁講:「我想爸爸擺啲種子落你度喎﹗」聽到大人紅都面晒,但又幾好笑。妹妹就思路直接,很少修飾,被媽媽Reina問為何唔鍾意爸爸時,竟然答:「你又話拍拖淨係可以鍾意一個人,我同你拍拖就唔鍾意baba囉⋯⋯」雖然戥陸永唔抵,但聽落好窩心呀﹗

姊妹裝出沒勁可愛吸睛

年紀相若的兩姊妹經常都會以姊妹裝示人,除了兩日讀同一間幼稚園着埋同一款格仔制服勁可愛之外,Reina都經常幫兩個愛女着一樣或相似的衣服,增加萌度。今年萬聖節兩姊妹分別扮貓女同巫女;去迪士尼着埋同一款米奇老鼠Tee;旅行齊齊襯埋一樣的衫褲鞋,好似twins;仲有紅粉緋緋日式浴衣姊妹版,勁吸睛﹗

延伸閱讀>>《DO姐再SHOPPING》返嚟喇!農夫DO姐同天然呆馬國明歐洲踩單車

LOAD MORE