【2018聖誕節活動】 電影迷最愛：聖誕怪怪傑、水行俠、大黃蜂等陪你過聖誕！

踏入下半年除咗代表暑假已經逝去，都係代表聖誕好快就到！聖誕節除咗食聖誕大餐同睇燈飾之外，當然唔少得係睇吓聖誕節有咩戲睇啦！今年聖誕檔期上映嘅電影可以話要乜有乜，無論係卡通動畫，或者科幻特技都有，今個聖誕可以坐定定等睇戲！

1. 聖誕怪怪傑

聖誕節梗係要睇返啲聖誕電影，今年12月上映嘅《聖誕怪怪傑》係改編自兒童文學書《鬼靈精》，今次呢套電影已經係改編自呢本書嘅第五部電影，唔知同之前嗰幾套有咩唔同呢？每年聖誕，一家大細坐埋一齊睇The Grinch可以話係指定動作，相信大家對青咇咇嘅Mr. Grinch都唔陌生，今年終於有新版本，一定唔可以錯過！

2. 無敵破壞王2：打爆互聯網

動畫嘅代表又點止得一套呀，經過一年之後《無敵破壞王》喺今個聖誕節強勢回歸！破壞王同BFF雲妮露繼續同你周圍走周圍冒險，今次佢哋除咗撞到迪士尼嘅公主們，仲撞到Star Wars嘅一班朋友仔，唔知又會創出一個點樣嘅歷險呢？

3. 水行俠

水行俠係DC出品嘅新一套超級英雄電影，繼2017年嘅《Wonder Woman》同《正義聯盟》，今年聖誕節有《水行俠》！科幻動作又點少得刺激又肉緊嘅打鬥場面，今次水行俠要領導海底王國嘅人民阻止企圖威脅王國的敵人，肯定有連場嘅動作場面，不能錯過！

4. 大黃蜂

以為《變形金剛》已經完咗？錯啦錯啦！今年聖誕Bumblebee 大黃蜂返嚟啦！新嘅導演Travis Knight配上新嘅班底，唔知又會唔會別有一番風味呢？齋睇trailer，今次Bumblebee除咗有一貫嘅動作打鬥之外，仲大玩愛情溫情元素，女主角Hailee Steinfeld甜美鄰家女孩嘅形象都同一向《變形金剛》女主角火辣性感嘅形象唔同，真係好令人期待！