30歲的意義就是「你已經唔可以淨係諗自己」

18歲係人生關口?緊係唔係啦。
反而……25歲同30歲更似一個分歧路。

by 蘇知 守夏

18歲係人生關口?緊係唔係啦。
反而……25歲同30歲更似一個分歧路。

25歲嘅暗示係「不再年輕」,新出道嘅偶像明星都比你年輕;
就算去到男人最愛嘅足球場,咩阿仙奴/曼聯/皇馬/巴塞……佢哋嘅「新星」對你嚟講都係「弟弟」,
簡單講,你再唔會有任何「可能下年出道做明星」嘅想法。

25歲係好多夢的終點,亦都係「成熟」嘅起點。

30歲呢?我得出的結論係

「你已經唔可以淨係諗自己」

讀書時,你係諗自己;
25歲前,你都係諗自己。
自己洗自己食,返到屋企關埋度門,擺低家用,月復一月。

30歲點解唔同咗呢?

大約由你第一次發現……
父母嘅一啲小病,要睇一個月醫生。
甚至係你自己,感冒都要睇兩次醫生。

以前…明明…可以自我收復……
而家自我收咗檔。

再攞命係,你30歲時,
你父母真係老,好多時會遇上「大病」。

我29歲嘅時侯,阿媽打電話同我講「子宮頸照到有嘢」。
當時,我就明,咩叫「開竅」。

以前我哋有事,會搵阿爸阿媽;
到我哋都30歲時,阿爸阿媽有事,就只能搵你。

你幾鍾意獨行,都始終唔再係一個人。

我明白已經唔係諗自己嘅時候,
即時睇下戶口有幾多錢、做手術要幾多錢、
返邊份工唔係自己鍾唔鍾意,而係經濟上可唔可以。

你正式進入「現實」。

再者,你接近會聽到阿爸阿媽講一句「我諗住退休啦」
無錯,父母拼搏半生,此刻係時候交捧。

自此,
屋企水電各種雜費,你會諗;
星期日飲茶,你再唔係坐低等食,食完等走,
而係主動嗌點心,食完主動畀錢。

「女呀,唔好太眼角高啦,要搵個人啦。」
「侄女,你知唔知你爸爸媽媽仲有咩望呀?望抱孫呀。」

望住頭髮漸白嘅雙親,
你終於都明點解咁多明明話「唔q結婚」嘅朋友,都結晒婚。

或者,你只係想見到父母開心咁笑返晚。
(即係擺酒嗰晚。)個個朋友都唔想擺,不過多數都係父母堅持要擺~

同時,你又發現,
身邊有啲朋友開始「發達」,亦有啲朋友開始「潦倒」。
明明十年前,大家一齊起步,
今日竟然你行富貴道,佢走陰陽路。

你會諗,自己點解唔係發達嗰一個;
你會驚,自己都會係潦倒嘅下一個。

你不斷咁諗,係因為30歲

好多嘢已經起步太遲,
一個唔小心跌低,又分分鐘欲救無從,為時已晚。

你諗自己前,先會諗下人哋。
有拍拖嘅,諗結婚;
結咗婚嘅,諗家庭。

諗自己?自己已經變得好微小。
因為不知不覺,你個世界已經好大。

是夜9點鐘,又係時候放工。
落到街,發現天氣忽然又變凍,即時wtsapp返「我們這一家」Group,
叫爸爸媽媽著多件衫,唔係一病又要睇4次醫生。

行到間糖水鋪,又記得「潦倒朋友」心情好差,驚佢嘢都唔食。
即時打個電話,睇下使唔使陪佢食少少嘢。

點知佢原來同「發達朋友」食緊飯,仲問你Join唔Join。

你心諗實在太好,「發達朋友」一定係有辦法幫佢。
呢個時候,個肚發出哀鳴,
原來,自己忙到成日都冇食過嘢。

再吞一吞口水,喉嚨果然有啲痛。
原來,作病嘅其實係自己。

去到最後,先至諗自己。
你呼出一口冷空氣,覺得其實都唔錯。

如果每個人到咗30歲,都會諗多啲其他人,
咁即係,身邊好多人,
其實都會關心自己。

應該係咁...
嗯…一定係咁。

LOAD MORE