feature

《無聲絕境》Emily Blunt 夫妻檔拍電影!4大一定要識的非典型驚慄片必睇原因

《無聲絕境》Emily Blunt 夫妻檔拍電影!4大一定要識的非典型驚慄片必睇原因

Shut Up,邊個出聲邊個死!呢條橋唔算好新,好多殺人片玩捉迷藏都玩過唔出聲,但都只係推向結局嘅情節,今次《無聲絕境》玩足成套戲足足90分鐘,唔單只戲入面要靜音mode,就連戲院內食嘢大聲啲,都可能招致全戲院嘅殺意,但係一路要保持安靜,一路追睇,因為有好多必睇要點!

by Cosmo

必睇1)靜靜雞,點樣生活?

套戲條橋好簡單,發出聲響就會引來怪物殺害。於是乎一家四口,兩大兩細點樣細細聲生活呢?輕輕步行路聲ok,咬耳仔聲線ok,所以佢地喺泥石地上鋪沙減低腳步聲;盡量用手語溝通,避免說話;用手食飯,唔用餐具;危急時到屋外放煙花,製造巨響引開怪物。At least,喺屋企頂得住,只不過要生仔,就算大肚婆捱到痛唔叫,個BB仔一出世就呱呱大喊⋯⋯

必睇2)個個演員都好戲,尤其阿媽Emily Blunt

套戲唔計死屍,基本上得7個演員(計埋阿B同阿伯),主要係兩大兩細嘅戲份。阿爸好偉大,原來佢仲係呢部戲嘅導演同編劇,自編自導自演,戲外佢同樣係女主角個老公,真係拍套戲捧自己同老婆上位。尤其女主角Emily Blunt,本身已經好好戲,由當年《穿Prada的惡魔》到《異空戰士》,仲有近年嘅《列車上的女孩》、《毒裁者》,今次不時要扮痛,無論作動生仔抑或踩釘,愈痛愈要忍住唔叫,七情上面表情贏晒,好應該有影后提名啦!

必睇3)女童角色度身訂造,本身失聰

入場記得唔好買爆谷,否則每食一粒都會成為全場焦點,特別當投入戲中聾啞女兒的角色,就連環境聲都無埋,全個戲院都好靜,都咪話唔緊張。原來,戲中飾演姐姐嘅的小演員美莉遜西蒙斯,本身出世後就因醫療失誤而失去聽力,慘變失聰人士,所以佢演繹聾女一角,真係度身訂造。係時候讚埋細佬,由童星諾亞祖比演出,之前睇過《奇蹟男孩》就知佢扮呢啲懦弱角色幾叻啦!

必睇4)想保命就要禁聲?

呢部戲最大特點,就係聲音吸引怪物,最後結局唔劇透,但係要保命,唔一定要唔出聲,只要識得搵方法,或者用其他更大嘅聲音掩蓋之前嘅聲音。而且,一個人好難生存落去,一家人互相依靠,學識一齊生存,就算辛苦都要延續生命,仲要帶來新生命。親情同愛情,就係無聲絕境嘅最大後盾,你知道嗎?

LOAD MORE