【小丸子迷注意】小丸子年糕蘿蔔糕工作坊+萌爆頸枕同你迎接新年！

Bilibala Bilibala 小丸子又嚟啦！完咗聖誕節同除夕元旦，梗係要期待下一個長假期啦，今個農曆新年有咩玩？小丸子今年就決定同花輪同學陪大家迎接農曆新年！櫻桃小丸子聯同奇華餅家推出新春限定課程：「櫻桃小丸子臘味蘿蔔糕及花輪同學紅棗糖年糕班」，等大家可以親手整小丸子年糕同蘿蔔糕！除咗親手整糕點之外，千祈唔好錯過換領7-Eleven 嘅櫻桃小丸子頸枕呀！

奇華餅家 X 櫻桃小丸子臘味蘿蔔糕及花輪同學紅棗糖年糕班

▲地獄廚神都輕鬆整到小丸子蘿蔔糕同花輪同學年糕？係真唔係？

如果要整呢個小丸子蘿蔔糕同花輪同學年糕首先要報名（報名詳情喺最底！）然後上堂當日係要去到位於皇后大道東嘅「奇華工作坊」，所以千祈唔好以為任何一間奇華餅店都得呀！

上堂嘅時候，師傅會先講解製作蘿蔔糕同年糕嘅每一個步驟應該點做，之後同學仔先會返埋位進行每一個步驟。「但我記性唔好唔記得啲steps點算？」唔使驚喎，因為你可以隨時問在場嘅工作人員，同埋師傅都會行嚟行去，所以你真係好擔心嘅話就去煩住師傅啦！

 

大會已經一早幫大家準備好哂製作蘿蔔糕同年糕嘅材料！所以唔使驚會成為地獄廚神，因為包成功！

 

盛載蘿蔔糕同年糕嘅容器係印有小丸子同花輪同學嘅樣，超級可愛！

 

蘿蔔糕製成品！係咪賣相一流先，小編作為一名地獄廚神都覺得呢個工作坊包！成！功！滿足感好大㗎呢！

 

當蘿蔔糕同年糕脫離模具嘅時候，你就會見到小丸子同花輪同學個樣㗎啦！

 

師傅真係超級好人同好玩，會超盞鬼咁行埋嚟問一唔一齊影相，小編當然唔會放過集郵嘅機會啦嘿嘿！

 

同場加映：小編上堂嗰日仲有小丸子同花輪同學派利是，真係好得意呀！

 

除咗蘿蔔糕同年糕，當然唔少得其他小丸子嘅新年產品：有揮春，仲有利是封添！

報名方法：

網上報名：按此

親臨報名：親臨奇華工作坊報名，可以用（Visa/Master/China UnionPay）或現金繳付學費

地址：灣仔皇后大道東188號2樓

電話：（852）2343 8106

Whatsapp：（852）9228 9517

營業時間：星期二至五 13：00 － 22：00；星期六、日及公眾假期 10：00 － 19：00

 

7-Eleven X 櫻桃小丸子 推出旅行頸枕

想帶埋小丸子去旅行？咁就要記住換領7-Eleven嘅小丸子同花輪同學旅行頸枕！

呢兩款櫻桃小丸子旅行頸枕有連帽設計，有保暖效果之餘，仲可當作眼罩使用，咁就可以免受機倉嘅強光影響而影響睡眠啦！頸位仲有啪鈕作固定，令使用時不易滑落！設計輕巧方便攜帶，咁就可以帶著小丸子去到邊瞓到邊啦！

換領詳情：

由 2019 年 1 月 7 日早上 7 時起，顧客於 7-Eleven 指定分店#購買禮盒類*滿$158，即可免費獲贈「櫻 桃小丸子系列旅行頸枕」乙個。產品數量有限,送完即止。

#此推廣不適用於迪欣湖及迪士尼行政大樓分店。

*禮盒類產品詳情須向店員查詢,並以分店為準。