發光氣球大解構! 究竟係「告白氣球」定「移動炸彈」?

最近節日連連,情侶出街受氣氛影響,都變得痴纏。
浪漫指數急升,自然就有求必應,於是出現一幕幕「男仔買嘢送畀女仔」。

by 新北由紀

最近節日連連,情侶出街受氣氛影響,都變得痴纏。
浪漫指數急升,自然就有求必應,於是出現一幕幕「男仔買嘢送畀女仔」。

咁都好正常,所以一般都有人喺街賣花,賣朱古力、幫你哋影合照。

但呢排有樣新嘢,就係「發光氣球」,又名告白氣球。究竟佢真身係咩呢?

來源:

似乎由中國大陸興起,但差唔多時間台灣都開始盛行。外國都有,不過多用嚟佈置結婚場地。咁多地方有,自然傳到黎香港。
簡單而言,就係於氣球裝入唔同顏色嘅羽毛(已經演變到入面裝咩都得),再加上LED燈連結電池開關,一上手,就閃閃下,浪漫又好睇。

此氣球又有一個別名,叫「波波球」,又叫「網紅氣球」,大都睇名都明,一班網紅拎嚟玩,又拍片又影相,於是紅咗。

原理:

一個氣球要升起,得一個可能性。
就係用氣體。

一般而言係用「氦氣」,因為係惰性氣體,相對上非常穩定。不過成本高,加上呢個氣球冇監管,貨源來自中國各地,又或是攤檔自製,於是……

有人換咗用「氫氣」。

成本上,一個波用「氦氣」,成本約幾蚊。
但用「氫氣」,成本就只係幾毫子。

一個波而家賣緊幾十蚊。可想而知,一用「氫氣」,自然賺得更多。

有媒體報道,內地一晚,一個攤主可賣超過200個發光氣球

危險性:

當冇咩監管,當風潮盛行,意外就易發生。
首先不論「氦氣」定「氫氣」,遇到明火都有爆炸可能性。

而「氫氣」就唔使講,相對更易爆炸。
內地發生過幾宗意外,都會一個共通點。

就係香煙。人來人往,個個拎住告白氣球,其中有人食煙,支煙篤到或長期貼近氣球。

就有機會產生爆炸,而且氣球多數近面部,面部容易燒傷。

南京就有意外,導至4人炸傷,其中2人面部二級燒傷。
同時,氣球嘅塑膠面遇熱融化,滴落嘅液體都足夠造成燙傷。

可以見到,極多淘寶有出售發光氣球
風頭一時無兩。

變奏:

由於氣球「氦氫難分」,爆炸事件都漸漸多人知,

唔同供應商又唔想冇咗「發光氣球」呢條財路,

於是就多咗「發光空氣球」,即係入面係空氣,唔會爆,用支桿子撐起個波。
但同時已經唔可以自然咁飛起,隨風飄揚。

一段潮流彷彿有公式,急速地飛起,再短暫地急墜落地。

發光當然靚,但大家要清楚佢嘅安全性,唔好令一個佳節,留有遺憾。

LOAD MORE