快餐輕食都可以唔頹?LOBSTER CENTRAL為大家帶來全新海陸盛宴

快餐輕食都可以唔頹?LOBSTER CENTRAL為大家帶來全新海陸盛宴

位於中環士丹尼街的LOBSTER CENTRAL,一直都大受中西區嘅OL歡迎,特別係佢招牌嘅龍蝦包同蟹肉包,真係令人食指大動!工作忙碌嘅香港人有時連食Lunch都冇時間,但係食快餐又頹又唔健康,LOBSTER CENTRAL提供嘅美式輕食,鮮味十足之餘又夠哂健康,仲好快有得食添,岩哂忙到爆既香港人啦!近日LOBSTER CENTRAL再推出六款菜式,令一眾「為食精」流哂口水,就等小編同大家介紹下啦!

輕盈之選

六款菜式入面,並中兩款係「輕盈之選」,岩哂一眾注重健康嘅OL。

By COSMO

▲三重鮮味生菜包 HK$118

呢個「三重鮮味生菜包」其實係墨西哥Tacos嘅改良版,用生菜去代替原本嘅墨西哥夾餅,既可以冇咁肥,又可以更加突出海鮮嘅鮮味,入面仲包住三款海鮮:原隻蟹鉗、國王大蝦同清甜龍蝦肉,配埋芒果牛油果沙沙醬,鹹鮮味同甜味非常突出,非常有層次感。

▲烤香蒜大蝦串  HK$98

健康人士嘅福音!經過烤焗過嘅國王大蝦,簡單咁用咗大蒜同檸檬皮做調味,加埋甜粟米、牛油果同迷你番茄,最後淋上果香味十足嘅特製柑橘醬。所有野MIX埋一齊味道超級清爽香甜,既樸實又健康。追求健康嘅你一定要試下呢款「烤香蒜大蝦串」啦!

濃香系列

除咗兩款「輕盈之選」之外,今次仲推出咗四款「濃香系列」嘅美食,食材一樣咁新鮮,但就更加飽肚,岩哂想食飽飽嘅你!

▲香蒜白酒蒸紐西蘭大蜆  HK$148

「香蒜白酒蒸紐西蘭大蜆」用上咗半公斤嘅紐西蘭Cloudy Bay大蜆,隻隻鮮甜多汁,用咗少量白酒、香蒜及香草,引出天然嘅蜆肉甜味!LOBSTER CENTRAL仲貼心咁配埋炸到脆卜卜嘅薯條,俾大家用薯條點充滿鮮味嘅蜆肉汁黎食,雙重享受!

▲慢煮牛腩黑松露蛋黃醬薯條  HK$98

呢個「慢煮牛腩黑松露蛋黃醬薯條」就證明咗簡單嘅野都可以好多變化,就算薯條都可以整到好唔同!脆卜卜嘅薯條下面收埋咗慢煮軟腍牛腩同半溶車打芝士,上面仲加咗黑松露蛋黃醬同辣椒粉,飽足感十足嘅惹味之選!

▲LC招牌龍蝦漢堡  HK$148

用埋鋪頭做名嘅「LC招牌龍蝦漢堡」,又點會令大家失望?漢堡包入面有足足有7盎司嘅巨型牛肉漢堡扒、半溶嘅車打芝士同埋鮮味十足嘅原隻龍蝦鉗。Juicy到爆牛肉汁嘅漢堡扒,配上龍蝦嘅鮮甜,將漢堡嘅味道昇華到另一個層次,包保食過嘅人都會俾佢嘅味道征服!

▲濃香龍蝦通心粉  HK$138

同茶餐廳Cross over嘅「濃香龍蝦通心粉」,品質依然有保證!新鮮札實嘅龍蝦肉加上用香濃龍蝦湯煮熟嘅通心粉,再加上生菜同洋蔥,濃而不膩味道岩哂每一個人!

LOBSTER CENTRAL

地址:中環士丹利街50號地下E號舖

電話:3565 6725

營業時間:星期一至三及星期日11:00-21:00;星期四至六11:00-22:00

LOAD MORE