今次公開兩間泰國本地人力推的船面餐廳，據說連其他城市的泰國旅客去曼谷時，也一定到訪，就知口味有多正宗！下次去曼谷除了行翟度翟，食番杯泰式奶茶雪糕，去下Let's Relax做spa呢類游客指定動作外，一於跟泰國在地人一起搵食，尋找最地道滋味！
登入 瀏覽本網站，可獲取積分換領專屬優惠
●身為遊客，JJ Green Market其實感覺較更闊落，更好行。
「泰」愛曼谷夜市
唔知大家知唔知，翟道翟旁有個JJ Green Market，主要賣古著同vintage擺設，亦有不少餐廳進駐。
呢個市集其實已經開了好一段時間，但風頭始終不及翟道翟，而且唔少旅客都以為佢同翟道翟一樣只在周末營業，所以平日人流唔算十分多，加上JJ Green Market啟動後不久，在翟道翟附近又開多了一個火車夜市，以致丁財兩方面，都曾一度有點凋零。
不過，由於場內的貨品始終較多元化，亦比火車夜市闊落、更好行，所以很快已收復失地。
●只獨沽一味賣傳統泰式船麵的Ajeimejisa，入夜六時半後，就會擠滿人。
辣到一秒變舒淇嘴
位於JJ Green Market餐廳區內，有一間獨沽一味只賣船麵的Ajeimejisa。現場所見，一到晚飯時間，九成食客都係泰國本地人。目測到他們個個都食到大汗夾細汗，但這完全唔關天口熱、無空調嘅事，而係佢地的船麵，出名夠辣。
天真而又唔信可被辣度KO的我，亦姑且相信店員推介，試一碗小辣船麵……
只係食第一啖，已經辣到一秒變舒淇嘴！
●Ajeimejisa的船麵湯底實在超濃，幾辣都忍唔住要飲晒佢！
Ajeimejisa的船麵湯底超濃郁，麵條選擇有米粉、glass noodles、蛋麵、公仔麵等，亦有炸豬皮同燒豬肉丸這類基本小食。
由於啖湯實在太濃太香甜，所以幾辣都好，都忍唔住要飲晒成碗湯！
INFO
Ajeimejisa
地址：JJ Green美食區內
人均消費：60-80泰銖
營業時間：6pm-1am（星期四）、4pm-1am（星期五至星期日）
JJ Green Market
地址：Kamphaeng Phet 3 Rd, Chatuchak, Bangkok
交通：BTS Mo Chit一號出口
網址： www.facebook.com/jjgreen59
●「船麵一條街」好幾間麵店，都經常大排長龍。
船麵一條街
另一間當地人最愛的船麵店，隱身在有「船麵一條街」之稱的小巷中，小巷距離BTS
Victory Monument勝利紀念碑站出口約七分鐘路程，搭BTS去十分方便，而且一定搵到。
千祈唔好好似我咁，信錯grab司機話會抄牌，而停到遠一遠，行到身水身汗！
●要找對Rua Thong Noodle，吃對船麵，請認住menu，是有條粉紅或粉藍色邊框圍住的。
船麵一條街內有好幾間麵店，每一間都大排長龍。行入少少，就會見到Rua Thong Noodle，由於好幾間麵店職員都是穿黑色衫，所以不要憑職員衣著顏色就盲衝入去。要認，必須認住佢哋個menu：有條粉紅或粉藍色邊框圍住的，才是Rua Thong Noodle！
●全部一口size的船麵，建議可全版menu每樣點一碗，埋單都係港幣廿零蚊。
一口一碗 愈食愈開胃
船麵全部都係一口size，每碗十二泰銖，即大概港幣三元，男生幾乎可以一啖就食完。如我不吃得太辣的女生，可能要分咗好幾啖，才食得晒。
呢間的辣度比Ajeimejisa更勁，但泰國人都毫無懼色，一口一碗，人頭計，起碼一人食十碗（心諗，洗碗姨姨真辛苦……）
建議可以全版menu每樣order一碗，有乾撈和傳統船麵，亦有香港較少見的粉色湯底。放心，粉色湯底其實是加了南乳，唔係辣椒。另外，餐廳亦有正常分量的泰北咖喱雞麵，應該係全店唯一唔辣的麵；湯底又香又滑，椰味濃郁帶清甜，雞鎚煮至軟稔入味，用筷子輕輕一夾，嫩雞肉就輕易夾得開，跟在清邁食到的味道，一模一樣，好滿足！
下次去曼谷，大家記得去試下喇！
●泰北咖喱雞麵是Rua Thong Noodle全店唯一唔辣的麵，湯底又香又滑。
INFO
Rua Thong Noodle
地址：1/7 Ratchawithi Rd, Khwaeng Samsen Nai, Khet Phaya Thai
交通：BTS
Victory Monument勝利紀念碑站出口約7分鐘路程
網址：www.ruathongnoodle.com
立即訂閱接收Cosmo最新潮流資訊
訂閱電子報，時刻掌握生活資訊！