editing

爸爸唔易做!5套父親節必睇電影揭示父親苦況

父親節2019 爸爸唔易做!5套父親節必睇電影揭示父親苦況

依家做老豆,唔同以前,仔女唔啱就要鬧就要打。嚴父呢個角色,Out架喇。新一代嘅老豆,要陪仔女玩、同佢哋溝通;要識好多嘢,係仔女眼中嘅偶像同superman,真係少啲精力同腦汁都搞唔掂。現實中嘅好爸爸唔易做,而電影中嘅老豆一樣有苦自己知。父親節不知道有甚麼父親節慶祝方法?不如就跟爸爸一同看一套電影,了解一下做爸爸的苦吧~

by 電影門外漢

《一個好爸爸》:為咗屋企人好,寧願自己受多啲苦

個個做老豆嘅,都想畀老婆仔女最幸福同愉快嘅生活。李天恩(古天樂飾演)做咗爸爸之後,就更加明白呢個道理,可惜「人在江湖,身不由己」。喺社團個個叫佢大佬,但喺小喜兒面前,李天恩就變咗24孝嗲哋。佢錫個女錫到燶,喜兒見到佢心口個老虎紋身好驚,佢就走去改咗個紋身變做隻熊bear bear;為咗唔畀喜兒知道佢嘅黑背景、黑歷史,佢更不惜改行開補習社。不過,除非佢真正退出江湖,否則佢好清楚,有朝一日實會因為自己江湖嘅身分,禍及妻兒。李天恩為咗頭家、為咗屋企人好,最終選擇咗假裝人間蒸發,寧願自己喺遠方忍受見唔到老婆仔女嘅痛苦。

《海底奇兵》:為咗保護仔女,要勇敢面對自己嘅弱點

有時喺仔女眼中,佢哋嘅爸爸就好似superman咁,靚仔唔在講,樣樣都識、樣樣都咁叻,仲可以保護佢哋添。但其實老豆都係人,總有脆弱或膽怯一面,又點會咁完美呢?雖然要克服自己嘅弱點一啲都唔易,但為咗保護寶貝仔女,就自自然然會bit晒啲勇氣出嚟!就好似一向驚驚青青嘅小丑魚爸爸馬倫(Marlin,劉青雲粵語配音)咁,佢個仔毛仔第一日返學,突然畀人類(一位牙醫)捉走咗。救子心切,馬倫唔諗得咁多,由大海一路游去悉尼,沿途遇上大白鯊、水母、海龜、急流,佢都無有怕!

《爸不得你快樂》(Toni Erdmann):為咗了解仔女,扮鬼扮馬都心甘情願

有好多老豆,都想了解多啲佢嘅仔女,但為咗父親嘅尊嚴,又要扮晒唔緊張。又或者,佢哋會扮鬼扮鬼,想辦法同仔女打成一片,融入佢嘅朋友圈,總之無所不用其極。一向鍾意搞爛gag嘅爸爸Winfried,一次放假遠道去探個女Ines,見佢喺大公司做嘢好辛苦,受盡屈委咁,心都痛埋。佢問個女,個女話無嘢。但呢位偉大嘅爸爸唔放心離開,竟然跟蹤個女去ball,偷偷哋喺佢面前出現,戴住假髮,喺佢啲同事同老闆面前介紹自己叫Toni Erdmann,話自己係咩網球教練,好有錢嗰隻,大話連篇。Toni越玩越大玩出火,出埋手銬鎖住個女,最後仲扮埋巨型毛茸茸嘅黑色怪獸出席Ines個生日nake party!Winfried為咗個女,真係可以去到好盡!

《誰調換了我的父親?》:為咗望子成龍,反而畀自己更大壓力

講到電影中嘅父親,唔可以唔提日本導演是枝裕和。而有趣嘅係,佢電影中的父親,多數叫良多。野野宮良多(福山雅治飾演)喺好多現代爸爸嘅寫照:工作狂,陪份工嘅時間多過陪個仔。仲有,佢對仔女期望好高,望子成龍,但有時反而令自己承受太大嘅壓力,真陰公。良多本身個樣已經好嚴肅,連教兒子慶多彈琴都好嚴厲,你話個仔點會唔驚你丫?兩父子冇乜溝通,關係自己差啦。直到良多好快知道咗,同佢生活咗6年嘅兒子,竟然唔係親生,一出世同另一個BB調轉咗;而佢嘅親生仔就係由良多同慶多親生爸爸齊木雄大 (Lily Franky飾演)同樣撫養咗6年。後來,兩位爸爸互相交換親生兒子,良多先發現自己有幾愛慶多、以往有幾忽略呢個乖仔,所以希望盡量修補父子之間嘅關係。

《比海還深》:為咗維護英雄形象,對仔女永無say NO

做人老豆甚艱難,佢哋成日要維護自己喺仔女心目中嘅英雄形象,對仔女嘅要求好難say NO,因為咁樣就唔夠威,有時都幾攰架。同埋佢哋就算背後受咗委屈,都唔願意畀仔女知道。另一個良多(阿部寬飾演)就係咁樣嘅爸爸。佢同野野宮良多啱啱相反:外表不修篇幅,窮光蛋一名。但佢好愛兒子真悟,可惜自己無出息,同老婆離咗婚,一個月只可以見個仔一兩次。呢位爸爸有一次帶真悟去買新波鞋,為咗唔想令個仔失望、唔想佢畀同學仔睇低,堅持要買對有牌子嘅波鞋,價錢當然貴好多。良多明知自己唔夠錢買,但喺真悟面前唯有死撐,而背後用咗啲小聰明,刮花咗隻鞋邊,話係次貨,叫個店員畀個discount佢,終於都畀買到,送咗畀個仔。雖然良多嘅前妻同緊個事業型又有錢嘅男朋友一齊,但喺真悟心裡面,良多永遠係佢最愛嘅好爸爸。

LOAD MORE