陪伴大家成長嘅恐怖片應該無乜幾多部，《死神來了》都算係當中嘅表表者！順著飛機座位次序死亡，加上血腥暴力嘅死亡方法，唔知又有冇曾經令你驚到徹夜難眠呢？不過人就係愈驚愈要睇，加上《死神來了》主角嘅死法集集新鮮，嚟到新一集唔知又有咩驚喜？
登入 瀏覽本網站，可獲取積分換領專屬優惠
點擊查看專屬優惠
《死神來了》自2000年推出第一集後大獲好評，之後平均每3年都有續集上映，但係繼2011年播出第5集後就再無更新，令到一班粉絲十分失望。但經過大家千呼萬喚之下，新線影業（New Line Cinema）確定《死神來了》返嚟啦，粉絲們終於唔駛等到頸都長嚕
除咗《死神來了》回歸呢個消息令人興奮之外，新一輯《死神來了》嘅班底更加係要令小編尖叫！新一輯《死神來了》嘅劇本將會交由著名恐怖片編劇Patrick Melton同Marcus Dunstan負責。Patrick同Marcus亦都係恐怖片《恐懼鬥室》嘅編劇，由此可見新一輯《死神來了》嘅驚嚇度絕對唔會係小兒科！
消息指Patrick同Marcus現正努力編寫新一輯《死神來了》劇本，一旦劇本搞掂就會即刻開拍新一輯電影，但至於開拍同上映嘅確實日期就未知喇！粉絲們既然都等咗8年，就耐心再等多一陣咁多啦！
《死神來了》每一集都會根據主角特定嘅位置順序，去安排佢哋一個一個死去。第一到第五集分別就係飛機座位、高速公路汽車排位、過山車座位、賽車比賽觀眾席座位，同吊橋汽車排位，嚟到第5集唔知編劇們又會有咩新意呢？網上就有有粉絲提議火車或者郵輪，唔知幕後團隊喺構思嘅時候又會唔會考慮下一班粉絲嘅意見呢？
立即訂閱接收Cosmo最新潮流資訊
訂閱電子報，時刻掌握生活資訊！