馮盈盈演活霸氣《果欄》小狼女！現實中同樣重情重義，係絕頂好家姐

《果欄中的江湖大嫂》題材新鮮，加上有一班好演員坐陣，開播以來反應不錯。其中，第一次拍劇的「貼地港姐」馮盈盈，憑住小狼女霸氣一角，演得入型入格，有義氣非常討喜，觀眾大讚呢個角色非盈盈莫屬。盈盈不嬲夠真性情，現實生活同樣夠豪爽有義氣，這正是她入屋的原因。

烈女不怕死 小狼女夠兇狠

馮盈盈在《果欄中的江湖大嫂》飾演火爆江湖女「小狼女」，一身衣着打扮以全黑或黑紅色示人，帶有「江湖味」，深黑紅嘴唇加怒啤眼神亦是icon，高傲冷酷得來極具霸氣。她在戲中經常有霸氣演出，無論哥哥、自己、朋友被欺負時，一定會以牙還牙，十倍奉還。見弱小有困難，又會挺身而出，剛烈之中帶點溫情。

現實中也講義氣 為細佬讀食品及營養學

在劇中，小狼女為了還畏罪潛逃的哥哥的清白而奔波；現實中，她也重情重義。她曾在《後生仔傾下偈》講起大學選科，當年選讀食品及營養學，背後原因和細佬有關。

細佢4歲的細佬，原來童年患病，盈盈話：「我細佬兩歲嘅時候就有慢性腎炎，咁呢個病就冇得根治嘅，一路就要靠藥物同食物嚟控制，佢一路以嚟都要食得好清淡，濃味嘅嘢都唔食得，要低油低鹽。如果無得醫嘅話，就成世人都要咁樣，當時見到佢冇啖好食，就諗住揀營養學呢一科，希望讀完可以幫到佢。」非常有心！雖然現時醫學昌明，有生物製劑令病患飲食上不用節制得那麼辛苦，但盈盈的心意，細佬收到晒！

MK VS 港姐

盈盈在劇中由頭到腳散發MK味，言行又非常市井，成日講「爆房」、「打斷你的手」等。而現實中她也經常被話MK妹，因為言行舉止好接地氣，粗粗魯魯、語出驚人，完全無所謂港姐的優雅。加上被網民搵返中學畢業後，漂咗一頭金髮加粉紅色挑染的相，MK到盡頭。不過佢自己就完全冇所謂，IG上嘅陳年舊MK相依然沒有刪除，完全唔介意人睇，率真可愛。她接受訪問時話，MK都係一種香港文化，唔介意做推廣大使！

小狼女一角 原本由Moon做？

盈盈同小狼女簡直合二為一，角色似是度身訂造，但原來劉佩玥（Moon）才是這個角色的真命天女，不過後來因檔期問題才改為由盈盈頂上。對於這些說法，盈盈睇得好開，話無收到明文通知呢個角色係邊個做，一嚟傾角色就已經係呢個，但也明白大家點解會咁諗，因為上年嘅影視博覽宣傳片已經有阿Moon。盈盈仲話Moon拍《跳躍生命線》同一個廠，在化妝間講返起呢件事都幾好笑。面對新聞，豪爽大方，盈盈真我個性正係佢成功入屋的原因！