feature

【周末好去處】去印章店、乒乓球室喝啤酒?港島區兩間型格隱世酒吧!

【周末好去處】去印章店、乒乓球室喝啤酒?港島區兩間型格隱世酒吧!

忙完一個星期,聽日又到星期五!TGIF梗係要出去玩吓開心吓,放咗工想去chill一chill或者周末想同朋友去飲杯嘢傾下計,但又唔想去嚟去去都係個幾間酒吧?無問題!!!今次等小編同大家介紹2間又有格調又隱蔽又適合摸酒杯底談下心嘅隱世酒吧啦!


磅太太 Mrs. Pound

磅太太位於上環嘅磅街,如果你平時經過呢個地方,你應該唔會覺得呢間係一間酒吧。磅太太嘅門口設計驟眼望似一間印章店,牆面嘅玻璃櫃放滿咗一個又一個嘅印章,旁邊仲標明咗印章店可以提供嘅服務說明,但呢間貌似印章店嘅舖頭原來就係磅太太!

你望住呢個放滿印章嘅玻璃櫃或者會問:「咁門口係邊?」但係喺呢度就要賣一個小關子,因為講咗答案比你聽就會無咗驚喜,小編只可以悄悄地話你知玄機喺啲印章度,不妨試下多手啲掂吓佢哋!

磅太太嘅室內設計充滿復古感,除咗天花板嘅波波燈之外,兩邊嘅牆都運用咗桃紅同墨綠呢兩隻對比色,營造出一種八九十年代嘅vintage感覺。眼見呢個復古嘅酒吧設計,有唔少顧客都不忘打個卡先!

酒吧嚟講最重要梗係酒啦,磅太太出品嘅cocktail睇得又飲得!睇得係因為某啲cocktail會用中國傳統瓷杯盛載,相當有特色;飲得係因為磅太太嘅cocktail一向都係信心保證,每一杯都係用心製作!

地址:上環磅巷6號地舖

電話:3426 3949

開放時間:星期一至五 1200-1430;1800-0000 | 星期六至日 1200-0000

乒乓城 Ping Pong Gintoneria

乒乓城概念同磅太太十分相似,因為佢哋兩間其實係姊妹店嚟架!乒乓城位於西營盤第二街,驟眼望過去你會以為呢間係一間乒乓球室,褪色斑駁嘅紅色大門加上「專業教授兵乓球,零售兵乓球用品」嘅大字對聯,你又點會估到呢間隱藏喺茶餐廳同飯店中間嘅紅色乒乓城竟然會係酒吧!

門口嘅設計已經夠盞鬼,你又點估到入面仲盞鬼。推開紅色嘅大門,你要行一條狹窄嘅樓梯,穿過樓梯就會真正到達乒乓城。雖然乒乓城嘅門口十分隱蔽細小,但原來樓梯底下有一個咁大嘅空間,而且裝修仲要咁時尚。乒乓城係走工業風嘅室內設計風格,超raw嘅水泥牆同橫樑營造出New York Downtown 嘅酒吧感覺,十分隨性寫意!

如果你係想飲各式各樣嘅cocktail嘅話,呢度就唔會啱你啦!因為乒乓城嘅cocktail淨係有 gin and tonic,亦都係因為咁所以乒乓城嘅英文係Ping Pong Gintoneria。不過千祈唔好以為得gin and tonic會好悶,因為呢度嘅gin and tonic五花八門,當然唔會係gin加tonic water咁簡單!乒乓城嘅gin and tonic 有好多特別嘅味道,好似加咗薰衣草棒、檸檬皮、黃瓜皮等,梗有一款啱你口味!

如果想飲其他嘢都得!除咗gin and tonic,呢度仲有多種外國進口嘅啤酒,當中蜂蜜啤酒同海鹽啤酒都好受顧客歡迎架!

 

地址:西環西營盤129號南昌樓

電話:9158 1584

開放時間:星期二至六 1800-深夜| 星期日 1800-0000

LOAD MORE