想知12星座喺床上嘅喜好同表現？
登入 瀏覽本網站，可獲取積分換領專屬優惠
點擊查看專屬優惠
白羊座：
個性比較衝動，充滿能量亦時有驚喜，喺床上佢哋鍾意做主導角色，但亦容易有唔持久嘅情況出現，因為佢哋太心急，好多時一開始就用盡晒啲力，唔識留前鬥後。
建議：如果你有個白羊座伴侶，不妨幫佢將節奏放慢，例如玩多啲有趣前戲，中間不時停落嚟轉下姿勢。
金牛座：
呢個星座出名有耐力，而且對性充滿了幻想，喺性事上，佢哋屬於容易滿足，你只要為性事加添一啲小情趣，例如著條透薄嘅上衣、擺啲sexy姿勢、將雪糕、蜜糖搽喺身等等，佢哋都會好投入。但由於佢哋鍾意穩定，唔怕重複，所以日子耐咗，佢哋喺床上嘅表現容易千篇一律。
建議：如果咁啱你係好鍾意驚喜嘅人，就要自己製造喇，搜羅啲玩具、好去處，其實金牛伴侶係好肯玩嘅，佢哋變得千篇一律，純綷係因為佢哋容易滿足啫。
雙子座：
佢哋有活力，又好奇，無論精神上同肉體上都係，可以話係思想最開放嘅星座，所以佢哋喺床上嘅喜好係會不時改變同進化！但有個問題就係，由於佢哋變得太快，佢哋有可能呢輪對性好有興趣，但過一輪又完全提唔起勁；甚至乎開始咗前戲，佢忽然分咗心，會走咗去做第二啲嘢，而唔覺得有咩唔妥。
建議：喺床上要諗辦法捉住佢哋嘅注意力，唔好有悶場，同時隨時要有plan B嘅準備！
巨蟹座：
喺眾多星座入面，佢哋最俾到安全感同愛嘅感覺對方，尤其是你哋啱啱開始甜蜜蜜嘅階段。但情緒化嘅佢哋，亦可能會由超體貼變得超唔細心，如果佢哋心裹面有太多其他掛累，就會做得唔投入，甚至求其了事。
建議：同得心靈咁敏感、脆弱嘅佢一齊，要盡量俾個穩定、有安全感嘅生活環境佢哋，如果唔係佢哋嘅情緒會影響埋你哋嘅床上生活。
獅子座：
熱情、浪漫、點子，獅子座都提供得到，思想好開放，無乜嘢會阻止到佢哋獲得歡愉。但要留意返，佢哋唔算好細心，可能有時會忽略咗另一半嘅感受。
建議：佢哋自尊心好強，如果作為另一半嘅有咩想大家調協、改善下，要搵個適當時機，婉轉啲咁提出，最好將件事包裝到新奇又有趣嘅好玩嘢咁。
處女座：
佢哋好願意服務別人，會調節自己嘅技巧同喜好去滿足對方，可謂好有效率。佢哋雖然聰明伶俐，但就唔係好有創意，同佢一齊，你預咗尋找火花、新點子嘅責任要由你自己負起。
建議：要佢哋諗啲花巧嘢係有啲難為佢哋，作為處女座嘅另一半要體諒喇！
天秤座：
佢哋重優雅、夥伴關係，對於愛愛，佢哋視為美好嘅事，所以佢哋嘅另一半同佢哋一齊，好多時都會獲得美麗嘅經驗。不過對於表達自己，佢哋唔算好習慣坦蕩蕩，想知佢哋對另一半有咩期望、對性有咩需要，可能攞把鉗都未必撬得開佢把口。
建議：溝通可以由你自己做起，多啲輕鬆咁同佢哋分享你嘅個人喜好同需要，同埋多啲從佢嘅行為動作去觸摸佢嘅心意，慢慢建立黙契，有時啲嘢又唔使下下用口講先明嘅。
天蠍座：
性，有人話係天蠍嘅第二語言。同佢哋一齊，你越少顧慮、越放得開，你會得到越高享受。不過留意返，天蠍控制慾強，擅玩「心戰」，一旦情感受到傷害，佢哋嘅反彈會好大。
建議：雖然控制慾強，但唔等如佢哋心腸蛇蠍，只係佢哋十分十分重視忠誠、信任，一旦破壞咗，佢哋就會好無安全感，想保護自己。
人馬座：
同思想開放、樂觀、愛冒險嘅佢哋做愛係樂事，佢哋活力非常充沛，如果你係好容易「攰」嘅類型，同佢哋一齊可能會比較......攰囉！佢哋有啲粗枝大葉，如果你咁啱個性相反，好需要另一半呵住鍚住，喺床事方面，你有時可能會有被忽略嘅感覺。
建議：盡量唔好單純以床上嘅經驗嚟衡量你哋嘅感情，留意下佢日常對你好唔好？重唔重視你嘅需要？人馬代表咗獨立同自由，如果你想刻意束縛住佢，反而會有反效果。
山羊座：
唔好俾佢哋好似比較嚴肅嘅外表呃到，其實佢哋內裹可以好熱情奔放，不過就要俾啲時間佢同你慢慢磨合。
建議：耐性，有耐性就可以了，佢哋唔係反應好快嗰類，但慢慢會同你建立出黙契。
水瓶座：
水瓶敢於創新，喺性方面都好鍾意試新嘢。佢哋思想開放，唔會隨便去judge人。 不過水瓶座對某啲人嚟講比較忽冷忽然，有時就算一齊喺床上， 都會忽然覺得佢哋好似疏離咗咁。
建議：平時多啲一齊從事一啲心靈溝通嘅活動，簡單如去海邊傾下心事，研究下星星都有助增進彼此嘅連繫。
雙魚座：
佢哋直覺好強，見微知著，對情感嘅觸覺十分敏銳，同佢哋喺床上，有較高機會做到身心靈合一嘅境界。佢哋有時比較極端，一係好無私，一係好自私，如果係後者，要小心佢哋利用情緒嚟控制你。
建議：雙魚係多愁善感嘅，同佢哋相處要俾多啲關心、細心，佢哋有安全感，就無咁易胡思亂想。
立即訂閱接收Cosmo最新潮流資訊
訂閱電子報，時刻掌握生活資訊！