Instagram你可能日日碌日日玩，但又係咪全部功能你都知？繼投票同問問題之後，呢排IG Story又出咗一個叫「SHARE WITH」嘅新Sticker，究竟係點用？呢個新功能隨時令到你俾人呃咗都未知，因為「SHARE WITH」Sticker可以幫你輕鬆製造不在場證據！今日等小編同你解構「SHARE WITH」Sticker究竟點用！
登入 瀏覽本網站，可獲取積分換領專屬優惠
點擊查看專屬優惠
IG Story新功能：「SHARE WITH」
呢排用IG Story嘅時候可能會發現多咗一個綠色嘅新Sticker，呢個「SHARE WITH」Sticker係可以比你指定邊個會睇到你嘅某個story！但究竟可以點樣巧妙地用呢個功能？依家即刻話你知！
「SHARE WITH」新功能使用步驟一
同平時post story一樣，影咗或者喺相簿入面揀咗一張你想post嘅Story。
「SHARE WITH」新功能使用步驟二
之後就揀 「SHARE WITH」Sticker。
「SHARE WITH」新功能使用步驟三
然後你就會被導往去另一個版面，之後你又兩個步驟要做，第一，要揀有邊個人會見到你呢個story（我就揀咗我兩位同事）；第二，要幫呢個Sticker改一個名（同事三分親），而Sticker入面最少要有一個人。Sticker嘅數目係無定嘅，所以為咗唔同嘅人去創建唔同名嘅Sticker都係可以嘅！
「SHARE WITH」新功能使用步驟四
當你揀好人，打好Sticker名之後，就可以將呢個Sticker放上個story度！呢個「SHARE WITH」嘅Sticker有4種唔同模式俾你揀，每個模式都有唔同嘅功能，千祈唔好以為淨係款式唔同咗，要小心中伏！！！
「SHARE WITH」Sticker模式一
模式一係實色嘅「SHARE WITH」Sticker，當指定嘅對象睇你Story嘅時候都會見到呢個Sticker出現喺個Story入面，而佢哋係唔會知道呢個Sticker有邊個睇到。
「SHARE WITH」Sticker模式二
要轉去模式二，你只要輕輕一按個「SHARE WITH」Sticker就得啦！模式二同模式一唔同嘅地方係：收到嘅人會知道呢個Sticker有邊個睇到！因為Sticker入面會有個細細嘅頭像icon，而最伏嘅係：頭像icon嘅排位係根據你同Sticker入面每個人有幾熟去排！即係話如果你同其中一個人喺IG交流得越多，佢喺呢個Sticker入面嘅排位就會越前。
「SHARE WITH」Sticker模式三
模式三其實無咩特別，同模式一大概相同，唯一唔同嘅就係款式，模式一係實色底，模式三就係透明底！
「SHARE WITH」Sticker模式四
模式四可以話係呢個sticker嘅重點！當你揀模式四嘅時候，個sticker會出現一句「This sticker is now invisible to viewers」，即係話就算收到嘅人都唔會見到有呢個sticker。換言之，收到嘅人唔會知呢個story淨係得自己見到，或者淨係得某幾個人見到。
當你post咗個story之後，呢個有「SHARE WITH」sticker嘅story會同普通story一樣出現喺指定接收對象嘅story bar度，會提醒返佢你post咗新嘅story。
而你都會同平時一樣睇到佢哋睇咗未。
至於點樣瞞天過海製造不在場證據呢？小編就發夢見過有朋友呃另一半話去咗做gym其實係同其他friend去咗蒲去飲嘢。為咗減低女朋友嘅疑心，佢就用咗呢個新功能post咗一張之前影落嘅gym房相，再較淨係得佢女朋友睇到同invisible mode(模式四)，輕鬆製造不在場證據之餘，其他人又唔會見到，女朋友都從無懷疑過。
咁究竟點知啲story有冇用到呢個新功能呢......你係唔會知㗎！除非你哋有common friend，咁就可以搵第三個人確認一下嗰個story係咪得你先睇到。但講真呀，如果有心要呃你，點會諗唔到要加埋你啲BFF同姊妹入個sticker度。
如果仲未有呢個Sticker嘅朋友仔可能就要耐心等吓啦，IG Updates會陸續更新。
立即訂閱接收Cosmo最新潮流資訊
訂閱電子報，時刻掌握生活資訊！