拜年三姑六婆Mean爆問答大會正式開始，教你應對以下5條必問尖銳問題

每年新春拜年，親朋戚友咁耐冇見，都總係對你嘅前途近況特別關心，問你好多又尖銳，又難答嘅問題。無論佢哋真係關心你，想你發達，又或者純粹睇吓你發咗達未，面對以下5條必問問題，只要學識以下幾招，包你可以立於不敗之地，招架住「進擊的親戚」。我宣佈：一年一度嘅新年問答大會攻防戰正式開始，各位戰友準備好未？

資料來源：LinkedIn

ROUND 1

攞命指數：★★★☆☆

回答難度：★★☆☆☆

 

攻方：「返緊咩工呀？／搵到工未呀？」

根據專家調查顯示，百分之九十九嘅姨媽姑姐都會問以上問題。之前答過幾多次都好，佢哋都係會問你，一針見血，十足開場白咁樣。梗係啦，一場親戚，使乜同你客氣呀？

 

守方：直線抽擊，還以顏色

做緊咩職業都好，其實都係有份貢獻社會（至少職責上係啦），咪直接答佢，再補多句簡介囉！就好似「我係做程式設計嘅，呀姑媽你最近話好好用嗰隻股票app咪就係我有份開發㗎！」任何工種都好，識咁講，佢哋只會覺得你好偉大，好叻仔。記住，要畀佢睇到你眼神係有團火。

未搵到工嘅戰友都唔會輸蝕：「見咗幾份工㗎啦，好快有回音。」Feel到你積極得嚟又唔係好食懶飛。

ROUND 2

攞命指數：★★★★☆

回答難度：★★★☆☆

 

攻方：「你逗幾錢人工呀？」

上一round窒唔住你，整多條更尖銳嘅問題，同你做個即時入息審查！

 

守方：搬龍門

見我著得身光頸靚就知我... 起碼三餐食得飽啦！你可以講：「我收入都維持到生計嘅，仲支持到我興趣添！我興趣係...」其實已經間接答咗佢：我搵到食，儲到錢，仲有時間發展其他嘢。呢個時候，就可以大講特講你嘅未來大計，將被動化做主動，一係佢好有興趣，一係佢行開唔想聽問第二個，贏晒！

ROUND 3

攞命指數：★★★★★

回答難度：★★★★★

 

攻方：「你嗰行收入／前景點㗎？」

私人嘢入唔到你位，嚟個大包圍式問題，從中套料，都知你搵唔搵到錢。親戚可能唔直接問你，用例子問你：「呀邊個邊個呢，做咗幾年iBanker，成日去邊度邊度旅行，過多幾年買埋樓結婚。

 

你呢？」

 

守方：沉住氣，扮sales

各位戰友千祈唔好破功！簡單講下自己點解想入呢行、呢行有啲咩做、有啲咩發展... 最緊要催眠自己：「佢哋唔了解我呢行做咩啫，無事嘅...」

ROUND 4

攞命指數：★★★☆☆

回答難度：★★★★☆

攻方：「有冇／幾時升職呀？」

姑姐，我都想知我幾時有得升職加人工呀！

 

守方：承接上題回答，保持樂觀（最好擠啲笑容）

「其實呢，過去呢年我就做過啲乜乜乜，老世都好欣賞我，畀機會我去發展㗎，同同事關係都好好。睇個勢，快㗎啦！」

 

呢一刻，你完全體現咗咩叫對人歡喜背人愁，即使你心入面默默流淚，都會保持笑容捱過呢幾分鐘。

ROUND 5

攞命指數：★★★★★

回答難度：★★★☆☆

攻方：「你啲表兄弟姊妹/某某，好似仲成功／搵得多過你喎？」

我諗好少人會直接咁問，唔通新年想開拖咩？但係慎防真係一支暗箭飛埋嚟，都要做定心理準備。

 

守方：蒙混過關

「佢哋咁成功，我都好戥佢開心呀，不如叫佢得閒過兩招分享吓吖？不過我依家都做得好開心，好熱愛呢份工作，未來都會有好多計劃...」

 

成功唔一定開心，做人最緊要唔好比較，呢啲人生哲理就唔係個個都明，遇到呢啲問題，含混過去算啦，最緊要自己覺得自己掂唔掂嘅啫！

 

以上問題，冇咁上下EQ都好難招架住，仲難過見工interview。講真，一年見得幾次，有咩咪答兩句，唔想答咪笑笑口hea咗佢囉。各位戰友無謂動氣，講吓新春辦咗咩年貨，或者食返幾件年糕好過啦！