如何化解尷尬？同死對頭狹路相逢3個對策

有無試過喺條街度同死對頭/仇人撞個正着，電光火石間唔知點反應，又驚自己表現得樣衰咗？

其實對策來來去去都係嗰幾個，重點係你用咩態度演釋出嚟！

對策1：當佢隱形，又得！

你好憎佢，直頭希望自己從來無識過呢個人，你唔想勉強自己扮無嘢，其實選擇唔打招呼係ok架。咁會唔會俾人話無禮貌、小器？既然呢個人喺你核心生活圈嘅外圍/已成過去/同你再無關係，就let him/her go啦！

態度演釋：你平時無乜事唔會同陌生人打招呼，係咪？亦更加唔會去諗個陌生人點諗。

對策2：唔停留，點個頭，亦得！

有時就算唔識，打個招呼都係ok嘅，四目交投時可以微笑一下，笑唔出就點個頭，對腳唔使停落嚟。

態度演釋：當佢係街坊，反應大概都係咁上下。

對策3：客氣回應，得咗！

如果對方撞到你拍晒咪、成條街都聽到，佢身邊又有其他人喺度，你又好難唔俾反應嘅，不妨都高調返少少響應，全程講最行嘅嘢，例如天氣、食咗飯未，佢講自己近況時，全部都回應「係呀」、「啊...」，佢問返你，乜都答「好好呀」、「唔錯呀」，客客氣氣，無得彈！

態度演釋：咁算唔算好假？如果你當佢係一個曾經熟絡嘅舊相識，呢個人見到你表現熱情，而你又唔係喺同一狀態，情況通常係咁上下啦。

CG! Tips：如果你之後對呢個人仲係好多嘢諗，包括嬲、激動、覺得受傷害，咁即係呢個關仲未完全過去，為自己好，要清晰設定/更新「關係斷捨離」 方案，唔好俾過去阻礙你嘅現在。初期仲會有啲情緒係正常嘅，俾佢浮上嚟，亦俾佢飄走，慢慢呢啲人、呢啲事會自然fade out。