feature

【全民造星】全新男子組合MIRROR 12個鮮肉成員大起底(上)

【全民造星】全新男子組合MIRROR 12個鮮肉成員大起底(上)

以為得韓國先有男團?錯啦錯啦!香港當然唔輸蝕,香港代表有全新男子組合MIRROR!MIRROR呢隊唱跳男子組合一共有12個成員,成員係由ViuTV大型選秀節目《Good Night Show全民造星》入面嘅參賽者精心挑選出嚟組成!究竟12個男仔每個有咩特別?有咩興趣?又有咩專長?今日就等小編同你大起底!


MIRROR成員一:Lokman

Lokman人緣超好,喺節目期間同其他參賽者相處都超融洽,所以MIRROR出道之後就名正言順做咗隊長。擔當住大哥哥嘅角色,之後嘅路就要睇實其他11隻百厭星啦!唔知佢又有冇信心呢?

【全民造星】全新男子組合MIRROR 12個鮮肉成員大起底(上)

你或者會覺得Lokman好熟面口,究竟喺《全民造星》之前喺邊度見過佢呢?原來佢早喺2013年已經開始參與電影拍攝,更喺青春舞蹈電影《狂舞派》入面飾演團長Dave一角,戲份都唔少㗎!

 

拍得《狂舞派》跳舞當然係佢強項啦!專長係locking嘅Lokman呢排仲玩埋舞台劇。

前幾個月同火雞姐、狄以達以及其他人公演咗舞台劇《HIHI大爆炸》,一連5場,反應都好熱烈!

MIRROR成員二:Alton

Alton最為人熟悉嘅應該係「尋求無悔真生活 路漫長也靜候」,呢句可以話係變咗《全民造星》嘅金句。事源係Alton嘅表演無辦法順利晉級,當主持人問佢有咩講嘅時候,佢就唱出咗郭富城《木偶襲地球》嘅呢句歌詞。

除咗識跳舞之外,Alton同時都係一位健身教練,有腹肌胸肌二頭肌嘅佢更加以「肌肉就是力量」嚟形容自己!

佢鍾意做運動嘅程度應該無嘢可以阻止到佢,佢IG發佈嘅相有超大部分都係同做運動有關:做GYM、跑步、跳舞、健美、障礙賽......(太多不能盡錄,有興趣就自己click入去睇啦!)

MIRROR成員三:Anson Kong

喺《全民造星》期間Anson已經受到唔少人關注,除咗係因為靚仔同識跳舞唱歌之外,更加係主持人王心美嘅top pick!每次Anson表演完之後,心美BB都會比個攬攬佢,真係好令人葡萄呀!

又識跳舞、又識唱歌、又有自信、有靚仔,唔怪得知成功出道啦!

《全民造星》決賽之後Anson都超識做,post返同每個決賽參賽者嘅合照,並附上千字文多謝佢哋每個嘅陪伴。

MIRROR成員四:Anson Lo

Anson Lo喺《全民造星》20強止步嘅時候令好多觀眾大跌眼鏡,唱同跳都係信心保證嘅Anson竟然無緣晉身決賽。不過ViuTV最後都無令大家失望,Anson Lo雖然入唔到決賽,但成功出道!

除咗實力超水準之外,Anson Lo嘅顏值同身材一樣不得了,唔知算唔算係MIRROR嘅門面擔當呢?

呢個實力加外形都咁吸引嘅package更加為Anson Lo增添咗唔少粉絲,每次出席活動都必定有一班小粉絲為佢嗌破喉嚨!

MIRROR成員五:Edan

可以話係《全民造星》嘅音樂小才子,每次個人表演都自彈自唱。雖然係音樂小才子,但係令佢出名嘅竟然唔係佢嘅音樂造詣,而係佢表演時不以為然嘅反白眼!

又識鋼琴,又識小提琴,又識唱歌,又識跳舞,仲要係大學dance team,邊個夠你嚟呀!

Edan仲要超錫屋企人,尤其係妹妹,喺佢IG都會見到好多妹妹嘅蹤影!真係好羨慕妹妹有一個又識音樂又體貼嘅哥哥啊!

MIRROR成員六:Frankie

Dancer出生嘅Frankie喺《全民造星》入面未必有好多鏡頭,但勝在靚仔又跳舞叻,所以最尾都成功出道!

雖然你未必對佢好有印象,但Frankie可以話係團隊入面嘅黑馬,佢早排就率先同姜濤Ian為韓國化妝品牌Etude House拍咗輯廣告照,有唔少網民更加大讚佢係三個入面最靚仔!

唔知Frankie嘅全白造型你哋又鍾唔鍾意呢?定係覺得韓風啱佢多啲?

LOAD MORE