Jingkungirls係乜東東？新進K-pop女團，還是本地跳舞組合？Jingkun者，京崑是也，傳統國粹代表，崑曲更有百戲之母的美譽，對千禧世代來說，難免有「老餅」印象，但偏偏有個港女為它深深着迷，一頭栽進戲曲的不歸路。這位Jingkungirl，叫張靜文，八十後港女一枚，在社交網開了個page分享學戲日常，還乾脆命名「港女京崑學會Jingkungirls」。
登入 瀏覽本網站，可獲取積分換領專屬優惠
▲80後美女主播張靜文演起京崑劇有板有眼！
張靜文細細個已經表演欲爆發，由ETV小演員到電視台記者和主播，她全都得心應手，直至踏上京崑的台板，才發現這門藝術是如此深不見底，驚覺和它「相逢恨晚」。認真的女孩最美麗，且看一位京崑女神是如何育成。
從童星到京崑劇演員
Q︰小學三年級開始做教育電視小演員，大學畢業後在電視台做新聞主播，好哋哋，為何走去學京崑，之後並一度成為全職京崑演員？
A︰鍾意做幕前，表演欲固然是其中一個原因，但學京崑之初，純粹為興趣，想利用工餘充實自己；另一個主因，是覺得京崑很靚，衫靚！妝靚！頭飾bling bling！之後，愈來愈迷上京崑的內在美，它的曲詞配合得天衣無縫；每個動作、站立姿勢，也有很多學問。
結果，就是這樣「叉」咗隻腳入去，注定走唔到。
Q︰既然對京崑那麼熱血，為何你的「生涯規劃」，再來個變數，吃回頭草，重返電視台？
A︰因為一段如電影橋段般的戲曲姻緣。 之前，和我一起全身投入劇場的拍檔，嫁了給一位內地崑曲演員，定居國內，剩下我一個人返全職，比較難搞；加上自己屋企問題，所以決定返電視台，做番文化節目記者和主持。
其實每個轉變，都令我會重新考慮，條路應該點行。但即使我回歸電視台，再返全職，卻不會放棄或對京崑停步。
放下主播光環 選擇台板
Q︰放低主播光環，全職做一般人認為未必搵到食的京崑劇，有沒有內心交戰過？
A︰外人覺得主播有光環，自己反而覺得冇咩特別，都係一份工。當時諗，做了六年多電視台，是時候轉變一下，要放低一啲嘢，所以又不覺得難。 老實講，在香港做全職京崑戲曲工作者，的確好困難，要靠政府funding，今次有，不代表下次一定攞到。
所以，當時我作出轉變時，最大掙扎，是怕入錯行；又怕會辜負鄧宛霞和耿天元老師，不能將他們創立的「京崑劇場」好好運作下去⋯⋯想着想着，覺得前路茫茫，講得俗啲，是會不會乞食㗎？如果最終，沒法做好老師對京崑劇團的心血，又會不會在浪費青春？想的很多。
全心投入京崑 夜夜流淚
Q︰當時連你自己都懷疑過自己，家人對你投入京崑藝術，又有何反應？
A︰他們其實都有微言；畢竟父母供書教學多年，我卻突然減了三分之一人工去唱戲，當時曾問過自己：是否太任性，沒顧及他們感受？有段時間，我曾經幾乎晚晚喊。
長輩對某些事的價值觀，是根深蒂固，他們會覺得：你唔鍾意做電視台，可以去做政府工或者大機構吖。唱戲唔穩陣，擺明冇前途。 有次媽媽說：「親戚問起你做乜嘢工作，唔知點答好。」我半開玩笑答：「照實答囉，我做劇團行政經理兼演員，又唔係唔見得光。」媽媽卻吐出一句：「都幾（唔見得光）㗎。」。
雖然我知道，媽媽不會禁止我做崑劇，但當下都覺得有啲hurt。唔支持唔緊要，唔好潑我冷水吖。
▲張靜文這位年輕京崑劇場演員，雖則半途出家，但《牡丹亭》、《玉簪記》、《白蛇傳》等旦角，她都參與過，並有板有眼。
立定心志 做京崑KOL？
Q︰我們見到你在Facebook開page出post又拍片，莫非想做京崑KOL？
A︰很多人對京崑有誤解，覺得好老套，鑼鼓好嘈，啲戲好悶。作為年輕人，我想用不同手法，試下出啲搞笑post，扮YouTuber教化妝，以輕鬆貼地形式，讓大家認識這種藝術。 曾有朋友入場睇我演出，話原來都幾好睇，冇想像中咁悶，呢個反應實在令我「老懷安慰」！
Q︰你大學時才首次接觸崑曲，其後以「高齡」學生身份半途出家去學劇，成不成問題？
A︰京崑演員講天分，有人領悟力高，一睇就明，有人練千次才學識，至於我呢，介乎兩者之間。始終廿歲出頭才開始學，算遲，筋骨比較硬，踢腿都踢得唔夠高，次次壓腿也好痛；不過不要緊，旦角可以有不同強項，我咪唱少啲打戲囉。
其實，最感激老師對我和另一位拍檔傾囊相授，五年來，不但在課堂上，平時和老師的日常相處，也感受到佢對藝術的一絲不苟及堅持，大家建立起難得的師徒關係。呢種學習，唔係一張note可以俾到。
人生如戲 戲如人生
Q︰眾多京崑曲目之中，誰是你最喜愛的女主角？
A︰《玉簪記》的陳妙常，她出家做了道姑，但依然有一顆少女心，愛上潘必正這位書生，她明明心裏喜歡，但又不肯去認；我們這個年代的女仔，有不少都係咁，所以演落好有共鳴。 我演得最多的是杜麗娘（《牡丹亭》的女主角），最初覺得，呢位女子太自戀，常抱怨冇人欣賞自己，夢到男主角（柳夢梅）後，念念不忘，甚至抑鬱而終。
「情不知所起，一往而深」，唔知點解鍾意呢個人，卻一頭栽下去，杜麗娘呢方面同自己有啲相似。 後來，自己經歷多了，開始明白，原來見過夢想中的美好，回到現實是更痛苦的。就如，若然當初我冇踏入京崑這一行，就不會有之後的煩惱。「不到園林，怎知春色如許？」呢句唱詞，真切實地反映自己的內心感受。
▲張靜文愛上京崑劇的原因之一，是覺得京崑很美，衫美，妝美，頭飾很bling bling！
崑劇反映港女愛情觀
張靜文認為，京崑劇目可以傳承那麼悠長，一定有某些元素，令不同年代的人有共鳴，例如，愛情。
「《白蛇傳》講的是白素貞與許仙一見鍾情，《玉簪記》的女主角陳妙常則對自己明明心儀的人，扭扭擰擰，不敢承認⋯⋯呢啲表現，古代同現代女生，其實分別不大。」她說。
photos by Tung
coordination by Tsui yi
立即訂閱接收Cosmo最新潮流資訊
訂閱電子報，時刻掌握生活資訊！