【TVB 萬千星輝頒獎典禮2018】台慶5位大熱候選視后 代表劇集逐個睇

今年係無綫50+1週年，呢個全香港最大嘅電視台唔經唔覺原來已經有半世紀歷史，五十幾年嚟成就咗不少嘅明星。萬千星輝頒獎典禮雖然冇五十年咁耐， 但由第一屆開始「視帝」、「視后」已經係拍電視劇嘅藝員所追捧嘅獎項，價值接近等同電影界嘅「影帝」、「影后」。今年2018年出產嘅電視劇質素比以往嘅更高，女藝員嘅演出亦越趨精湛。雖然今年視后候選名單仲未出，但小編就睇好以下五位女藝員，絕對有望問鼎視后！

萬千星輝頒獎典禮2018視后大熱：李佳芯《BB來了》

《BB來了》可謂今年最吸睛嘅小品劇，不但劇情貼地，對白又寫中咗好多港媽港爸嘅心聲。 (李佳芯BB演技好過視后！《BB來了》爆紅有原因)

最最吸睛嘅當然就係李佳芯嘅演繹，將一個事業型女人害怕做母親嘅軟弱，到成為一個母親後嘅堅強，兩者都演繹得恰到好處！

李佳芯所演的角色一向予人嘅感覺都係靚女、高傲、離地和深不可測，就好似之前《誇世代》嘅離地港女Paris和《踩過界》嘅夜蒲大狀，但原來當要演一個不顧形象、需要貼地和現實嘅新手媽媽時，李佳芯都一樣可以拋開靚女包袱。

由從前的姣精，到之後的港女角色，李佳芯一步一步證明自己的演技，實在係非常值得加許、讚賞和鼓勵！

大熱指數：5/5

▲李佳芯在劇中跟奶奶大罵嘅劇情，掀起咗全港婆媳惡鬥！

萬千星輝頒獎典禮2018視后大熱：陳煒《果欄中的江湖大嫂》

陳煒今年雖然只有兩套電視劇作品：《果欄中的江湖大嫂》和《宮心計2深宮計》裡奸到出汁嘅太平公主，但兩套都深入民心！

《果欄中的江湖大嫂》裡面飾演一個本為明星仔卻因失婚後回港接管家族生意，被逼做果欄欄主的女強人，更逼住要喺男人堆中受冷嘲熱諷，仲要做埋男人嗰份擔擔抬抬！

煒哥不論外形上和演技上都拿捏得好好，可能因為年紀和經歷，由衷地演活咗果欄嘅大嫂角色！

大熱指數：4/5

▲喺《宮心計2深宮計》雖然奸，但連續兩個夫君都因佢而死，嗰種傷痛佢都演繹得好正！(寄情工作劇接劇 《果欄》陳煒失婚變女強人)

萬千星輝頒獎典禮2018視后大熱：胡定欣 《宮心計2深宮計》

胡定欣雖然已憑《鬼同你OT》及《城寨英雄》連續兩年獲得視后殊榮，但今年她喺《宮心計2深宮計》裡飾演本來仁慈但最後因無子嗣而開始對皇帝身邊啲女人心生妒忌，最終仲要殺人而逼到皇帝要將佢打入冷宮嘅皇后王蓁，演得非常精彩！(從閒角到視后！大銀幕再拍檔吳鎮宇，胡定欣：第一次都給了他)

一開始嘅仁慈、大方都惹得觀眾喜愛，佢用盡千方百計去令自己有仔生，本來有都搞到流產嗰種女人先感受到嘅切膚之痛，真係非常有共鳴，演繹得扣人心弦！

但可能因為已經連獲兩屆，好高高層有好大機會會將呢個獎項送俾其他女藝員，畢章獎項都係「鼓勵」。

大熱指數：3/5

萬千星輝頒獎典禮2018視后大熱：黃智雯《三個女人一個因》

黃智雯絕對係今年嘅黑馬，2018年雖然佢只係得《三個女人一個因》呢套劇，但佢將擁有精神分裂嘅大律師演繹得令觀眾拍爛手拳！

同時間要演正經嘅大律師方以因、又要演癲喪嘅Pina Colada，仲要演埋有抑鬱嘅愁愁擘擘，論演技，呢個真係一個好辛苦嘅角色，但黃智雯嘅努力並冇白廢，成功贏得觀眾嘅掌聲！(黃智雯時尚品味大躍進！《三個女人一個因》演多重人格盡曬演技)

而入行十年嘅佢，一步步由閒角演到今時今日嘅第一女主角，相信佢下過嘅苦功都不少，所以今年佢都真係有機拎視后！

大熱指數：2/5

萬千星輝頒獎典禮2018視后大熱：劉佩玥《跳躍生命線》

《跳躍生命線》係今年嘅台慶劇，而劉佩玥今次亦係第一次擔正做女一，但佢演剛強女救護員都演繹得唔錯，打破佢一貫柔弱女生嘅形象 (台慶劇《跳躍生命線》 劉佩玥上位女一4妙法)

唔能夠講佢一定可以拎到視后，但問鼎角逐嘅話，絕對都有資格有餘！

大熱指數：1/5