feature

【萬千星輝頒獎典禮】十年台慶最佳劇集晒冷,究竟有咩勝人之處?

【萬千星輝頒獎典禮】十年台慶最佳劇集晒冷,究竟有咩勝人之處?

每年嘅萬千星輝頒獎典禮都係TVB嘅年度盛事,除咗一班藝人嘅衣著服飾會成為焦點之外,不得不提嘅當然係最佳男女主角、配角、同劇集會花落誰家?要成為最佳劇集,除咗最基本有好劇本同一班好演員之外,一定係有啲過人之處嘅,等我哋嚟一齊睇吓究竟過去10年嘅台慶最佳劇集,究竟有咩令佢哋成功奪冠?


第八位:跨世代(最高收視28點)

【萬千星輝頒獎典禮】10年台慶最佳劇集晒冷,究竟有咩勝人之處?

上年熱播嘅跨世代雖然攞咗2017年嘅最佳劇集,但原來係10年嘅最佳劇集當中收視最低嘅一套。(應該係因為越嚟越少人睇電視!)佢嘅優勝之處之一係演員陣容強大,主演嘅演員包括歐陽震華、陳 豪、張繼聰、田蕊妮、 李佳芯等等。另外,網民都大讚《跨世代》係TVB近年少數有深度嘅電影,以「時空穿梭」嘅設定帶出香港50年嘅變遷,除咗有TVB一貫嘅家族恩怨情仇內容之外,更有諷刺社會時弊嘅題材,TVB得嚟好唔TVB!

第七位:天與地(最高收視34點)

【萬千星輝頒獎典禮】10年台慶最佳劇集晒冷,究竟有咩勝人之處?

天與地不得不提嘅當然係佢嘅主題曲,就算去到而家只要你唱「如果......」,都會有人接到「命運能選擇」,天與地嘅主題曲簡直有洗腦嘅功能。除咗主題曲,天與地入面食人嘅情節喺當年都好爆,透過為求活下去而要食人嘅橋段帶出人性嘅陰暗面同道德觀嘅淪陷,係TVB極少有嘅劇情。另外,天與地嘅金句都曾經紅極一時,好似「This city is dying」同「香港人最擅長係乜?係善忘!」。

 

第六位:使徒行者+城寨英雄(最高收視35點)

【萬千星輝頒獎典禮】10年台慶最佳劇集晒冷,究竟有咩勝人之處?

2011年嘅《使徒行者》出位之處當然係林峯飾演嘅「爆seed」同佘詩曼飾演嘅「釘姐」角色深入民心。《使徒行者》除咗係被網民稱為係TVB臥底題材劇集嘅高峰之外,亦都係林峯告別TVB嘅作品!

【萬千星輝頒獎典禮】10年台慶最佳劇集晒冷,究竟有咩勝人之處?

2015年嘅城寨英雄題材新穎,唔單止玩懷舊,仲玩功夫,再玩懸疑。平時斯文靚女嘅胡定欣同王君馨大家可能見得多,但識武打功夫嘅佢哋大家都可能未見過!

第五位:潛行狙擊(最高收視40點)

【萬千星輝頒獎典禮】10年台慶最佳劇集晒冷,究竟有咩勝人之處?

潛行狙擊嘅成功其中一個原因一定係因為謝天華飾演嘅「Laughing哥」,Laughing哥呢個角色深受家庭觀眾嘅愛戴!因為《潛行狙擊》第一季同Laughing哥嘅成功,其後更開拍電影版同《潛行狙擊2》,誓要再接再厲!

第四位:衝上雲霄II(最高收視41點)

【萬千星輝頒獎典禮】10年台慶最佳劇集晒冷,究竟有咩勝人之處?

繼衝上雲霄第一季嘅成功,10年之後TVB終於推出衝上雲霄II,令經典再次重現!衝上雲霄II更加係超揼本製作,專程去到台灣拍攝,靚人配靚景,畫面超級豐富。另一個賣點當然係「Cool魔」張智霖,佢帥氣嘅機師造型成功迷倒一班師奶粉絲!

第三位:公主嫁到(最高收視45點)

【萬千星輝頒獎典禮】10年台慶最佳劇集晒冷,究竟有咩勝人之處?

淨係《宮心計》原班人馬拍攝呢個綽頭已經夠大,加埋演員嘅陣容鼎盛,除咗有主演 佘詩曼、陳 豪、鍾嘉欣、黃浩然、陳法拉、馬國明之外,仲有關菊英、李香琴、惠英紅同謝雪心呢啲呀姐級人馬。雖然套劇嘅包裝係古裝宮廷,但絕對唔係一貫嘅勾心鬥角,反而係輕鬆胡鬧劇,真係估佢唔到!

第二位:巾幗梟雄(最高收視47點)

【萬千星輝頒獎典禮】10年台慶最佳劇集晒冷,究竟有咩勝人之處?

「人生有幾多個十年?最緊要痛快啊!」柴九嘅金句相信有睇過巾幗梟雄嘅觀眾都一定會記得。巾幗梟雄應該可以稱得上係近年最多金句嘅劇集,除咗「人生有幾多個十年?」,仲有「水裡水裡去,火裡火裡去。」、「佢扼住你嘅喉嚨,,其實你都扼住佢嘅喉嚨……」、「打交唔係鬥邊個大隻,係鬥邊個唔怕死,唔怕死就羸。 」.....仲有太多實在不能盡錄,可能有令到人銘記於心嘅金句就係其中一個跑出嘅關鍵!

第一位:溏心風暴之家好月圓(最高收視50點)

【萬千星輝頒獎典禮】10年台慶最佳劇集晒冷,究竟有咩勝人之處?

有高達50點嘅收視榮升第一位!!!溏心風暴嘅家族爭產劇情長做長有之餘,觀眾都超like超buy,好似越明爭暗鬥就越鐘意睇!計2007年溏心風暴第一季攞咗最佳劇集之後,2008年嘅溏心風暴之家好月圓再下一城,連攞兩年最佳劇集係勁嘅!

LOAD MORE