余迪偉信箱：小三是潑婦，但你是淑女嗎？

你好廸偉，

我啱啱同拍拖兩個月既人分手。 我同佢係用APPs識的，起初都只是想識唔同既人傾下計，後來傾落覺得幾啱傾佢幾好人。佢當時話啱啱同女朋友分手，佢有提及同佢女朋友唔夾之類既問題。識左差不多一個月我地見面，佢好有風度所以對佢已經有好感。之後都有一直短訊交談，大約過多幾個星期佢先再約我見面，佢都依然好有風度，但我有時見佢既神情係好唔開心，亦間中提及佢EX既事。再過多一星期我地再出街佢拖左我隻手，我地正式開始拍拖，不過我一直都感覺到佢未放低佢EX，我問佢地有無聯絡，佢話無。

有一次佢話同我影相，係佢啱換既新電話見到佢同EX合照，佢講電話又神神秘秘，我就忍唔住問，佢當時就話EX合照係記憶咭既舊相，傾電話人只係普通朋友無神秘，係我敏感。第二次佢同我一齊玩緊電話時有訊息到，我見到係佢EX個名，我問佢佢話普通朋友，我叫佢俾我睇訊息佢唔肯，仲話我唔信佢，我當時好直接答係唔信，之後佢即刻認錯，話怕我嬲所以呃我話唔係佢EX。接住兩，三次都係俾我發現佢瞞我同EX聯絡，我每次都叫佢諗清楚揀定先再搵我，佢每次都抱到我好緊唔放手唔俾我走，最終又心軟信佢唔再同EX聯絡原諒佢。

有一日佢EX係FACEBOOK留言俾我內容大概(呢D男人我唔要留返俾你，又話佢地一直未分手)。今次我就同我男朋友嘈得最勁，佢不停捉住我叫我俾最後一次機會佢，話一定唔再心軟覆佢EX點搵都唔再覆，最後我當然又心軟。第二日佢EX不停搵佢，佢俾部電話我睇晒訊息內容大概(要見面，就算有女朋友都唔介意，要出來交代)當日唔理佢。再到第二日，佢EX玩到上門搵佢家人，所以我陪佢一齊出去見佢。一見面佢前度當然不停講難聽說話俾我聽，但係我一句都無應，因為我唔想同潑婦嘈。之後就問我男朋友計數，最終話要返五千蚊，約我男朋友第二日交收。

我男朋友當時話佢EX好恐怖，我就話大陸女人分手係講錢，港女係講面。男朋友就話搞清楚呢個變態女人既事，以後會對我好好，因為知我對佢好好一心一意係佢身邊支持佢。錢既事情解決，我以為我真正可以同我男朋友開心咁過，但係個大陸女人點會就咁算，佢依然不停約我男朋友，開頭我男朋友都有俾返訊息我睇，之後我問點解呢排無訊息，我男朋友話佢無再搵，我當然唔信。之後又嘈了，又氹返(話呢個世上無其他女人都唔會再要大陸婆)，又繼續。最後我男朋友話我太多疑提出做返好朋友，等大家再了解過先。

做返朋友三日俾我知道佢同返大陸婆一齊，佢仲答我兩個都鍾意，但我太多疑俾到壓力佢，同我做返朋友先，了解左可能有復合機會。

我當然好嬲，但諗左幾日真係唔捨得所以都有覆佢訊息。我唔知我係想報復定真係咁愛佢?

希望你會回覆!

WT

WT：

好簡單，人家話到明唔同你玩了，你還死纒爛打何干呢！

你們跟前男友的關係，從來建築在不信任之上，我不明白有甚麼好玩，他條件就算有多好又如何？一個帶着前度新喪的陰霾來開始另一段關係是不智；你幫他延續再放大那陰霾是白痴。你那些被騙後扮堅決，叫他選擇清楚才找你，然後被他抱得好緊不肯放你走，多戲劇性、綺麗、浪漫、淒美啊！你當天為甚麼不報警？多次的心軟只會令你越踩越深。

好了，你跟他前度見面，被人當面對你駡盡難聽的說話，那是你自討苦吃！你為何要做就一個跟她見面的機會呢？那件事本身完全是你男友的問題，你要求在那場合出現是傻；你前男友容許你出現是錯。你與前男友成就了那種兩個女人爭一個男人的場面，你說她是潑婦，我也不見得你有多淑女，因為她成為潑婦，也是你有份孕育出來的。

還有，你心裏有太多幼稚理論，我不知你看甚麼教壞人的劇而學上：大陸女人分手講錢，港女分手講面。懇請你，作為我的讀者，長大吧！由始至終，你前男友容許你們兩個在他身邊糾纏，已不是君子所為，處理的方法，更是極度幼稚的懦夫。這種男人，若樣子省鏡，身型超正的話，用作一夜情還勉強可以！

你，請勿再天真，不要再心軟。想報復？你有籌碼嗎？仍愛他？便是你給予機會讓別人在你的傷口上灑鹽。

想想在這段所謂情上學到甚麼，從新上路吧！

余迪偉上