勿做破壞情場秩序的麻煩友

Dear D9,

我有一個朋友，有一個拍拖五六年的女朋友，但兩年之前因為去英國工作一段時間，女朋友出軌跟他分手。由於不想再去適應新的戀人／戀情，加上父母認定女朋友是「未來新抱」，佢好不容易才將女朋友追返黎。不過追番返黎之後女朋友對佢忽冷忽熱，重視工作多過同佢一齊，而佢自己都心灰意冷，同女朋友有名無實，所以成日又會出去撩女仔、夜蒲。呢ｄ都算，始終玩玩下，唔係認真的。至弊佢又漁翁撒網，學你話齋，成日周圍放火，同各種各樣的女仔「認真地」曖昧。不過佢放火得來對方通常都知道佢有女朋友，咁我地班兄弟都無話可說，始終人地係自願的（雖然最後通常都因為佢唔肯同女朋友分手所以ｄ女仔會自動離開佢）。

其實佢呢個狀況，我地都成日叫佢乾脆同女朋友分手（反正佢女朋友可以接受佢自己一個去旅行或者同其他女仔去旅行，而佢女朋友同其他男士去旅行、約會）唔好阻住自己另闢戀情。不過佢覺得接受唔到中間冇拖拍 ge 空窗期。我自己冇拍過拖，佢成日話我唔會明白習慣拍拖 ge 人突然之間冇拖拍 ge 空虛寂寞。咁佢都咁講，我咪只好將逆耳忠言GOOD一聲吞落肚囉。

問題來了，有一次我地一班人約出黎聚，本身正常不過。不過佢預先話會帶個女仔黎，叫我們係個女仔面前千祈唔可以提起佢女朋友／佢有女朋友 ge 事，話今次呢個唔知佢有女朋友。出到黎之後我地觀察到個女仔係ｄ好純好乖 ge 好女仔，真係勁冧佢，甚至頗為主動，二人不時有超越一般朋友 ge 親密舉動同接觸，而個女仔絕對唔係果ｄ大膽類型或者好玩得唔介意肌膚之親 ge 女仔，所以我地都覺得個女仔真係好中意我朋友，以為自己找到筍盤，仲帶埋自己比ｄ朋友見，好似真係認定名分咁，先會衝破心理關口。可惜 ge 係，雖然 ge 女仔係個好女仔，但係外貌同性格都唔似我地個朋友中意 ge 類型，雖然唔排除佢突然之間受到刺激口味大轉，但衰ｄ講句，個女仔個樣甚至有ｄ恐怖，所以兄弟們一致認為朋友只係見到人地送上門，盛情難卻就「發展」下，收下兵，得閒攝下時間。我同ｄ兄弟雖然覺得個女仔真係唔係美女（你知啦，唔係美女同情分都低ｄ架啦），但始終覺得個女仔比朋友蒙在鼓裡，遇著感情騙子，雖然唔識佢，又唔係美女，都覺得很內疚，好似做左朋友 ge 幫兇。而呢個感情騙子又係自己朋友，點算好？其實做幫兇真係唔好受。下次如果朋友再帶佢出黎，唔通仲要繼續做沉默的羔羊？

請賜教！！

Erdnuss 上

Erdnuss:
看你的信，由你引述我說過的話，便得知你是我的聽衆之一或讀者，那你應該沒可能不知我一向宣揚的理念：人家的情事，你去插手，你就是破壞秩序的八婆。而八婆十居其十對這世界都是沒貢獻的。唯一自圓其説地相信有貢獻的是：「他是我的朋友嘛，我想幫他！」又或是，在這個案：「那是個好女孩嘛，我想幫她！」八婆就是喜歡冠上救世者的名來「幫忙」這世界運轉，但往往結果是「阻住地球轉」，因為八婆的所有舉動，只源於多管閒事、八掛。

那女孩死心塌地般奉獻，你如何有能力去猜度呢？正如你那群朋友都說她的外貌「甚至有啲恐怖」，那可能她也自知沒有太大能力在「市場」上釣到大魚。所以若然她這次觸礁，也是她自己成長的一課，被傷害對她來說，也未必是壞事，至少可錯多一次，又上一課。怎樣也好，她如何選擇，由她自己的命運及智慧去判斷，為何是你可以去「幫忙」！反正，在我看來，你就算以為自己在普渡眾生，告知這女孩的「所謂」真相，若她真的那麼愚蠢，她又會聽你的一套嗎？她可能會求證於你朋友，然後你朋友與你反目；她可能覺得你朋友會放棄女友而與她一起、會由玩家變成她唯一的裙下之臣。這絕對算無可算。

你切勿掛名「好心」而去做结果一定是壞事的鈎當。

你既然已認定你朋友是感情騙子，看不起他，又不想做幫兇了，那你為甚麼又與壞人為伍？你若是那麼有立場，為甚麼不告知他你看不過眼、鄙視他的所作所為？為甚麼你仍然視他為朋友？為甚麼仍會想著有下次他帶她出來的局面？你大可對他說：你不再作騙子，我才再與你做朋友！

話到底，他是不是真正的騙子，以你從沒拍過拖的資歷來說，又懂得判斷嗎？

余迪偉上

---------------------------------------------------------------------------------------

戀愛問題天天多？假如你有感情問題，歡迎e-mail到cosmo@scmp.com，subject 註明迪偉愛情信箱，一經選中，迪偉會親自回信解答你的戀愛謎團。

作者Profile:

余迪偉，無忌諱！

多媒體表演創作人。紐約科技大學傳播系碩士畢業。生活多爪多棲、冇規冇矩，但有態度。商業電台叱咤903《1872遊花園》及SmarTone娛樂台節目主持。 著作有《一本精華遊》、《筆舉亂插》、《送給情人的禮物》。