過分關心反成分手契機？

自小長輩教我哋要愛己及人、將心比己、己所不欲勿施於人……呢啲態度無錯可以減少地球累積自私精，但總是將自己嘅想法套喺對方頭上，assume人家好似你咁體貼自己，到頭來有可能種下鬧交甚至分手嘅禍根。唔想因為期望所以失望，不妨從此relax啲，特別於下列事情上，因為一般男人冇預期得到這樣的對待，相反地，佢哋亦唔會自動地這樣對待你。

1. 無微不至的照顧
一般女人將「患難見真情」戲劇化、浪漫化，而最常發生又最基本嘅測試就係病。如果男人冇為佢半夜跑去七仔買藥、陪睇醫生、煲粥或定時定候慰問，女人自會心裡有數，甚至懷疑「他不夠愛我」。相反地，當女人把男人照顧得無微不至時，男人當然會覺得妳好溫柔，娶得過，可是普遍男人其實未必留意得到。就算妳做得唔足，佢亦唔會因此記妳大過，因為病乃十常八九，唔駛小題大作。

2. 顯細心的小事
女人有時真係好抵讚，男人自己都察覺唔到嘅需要，女人也能體貼照顧，使男人越來越愛妳。不過，假使妳冇幫佢修補穿窿衫、買過批新底褲呢啲眉絲細眼小事，又唔代表佢會扣你分，因為佢自己都唔知有呢啲需要。而你也不用期望太多，除非開口要求，否則好難等到佢主動送妳小小心意。

3. 玩驚喜的大事
就算再忙嘅女人，都可以抽到時間為男人搞搞驚喜，譬如為他計劃一趟旅行賀生辰，行程安排精彩，酒店舒適又價錢合理，唔駛操心之餘，仲保證喜出望外。男人會欣賞及感激你嘅心思，但請勿倒頭來埋怨佢點解冇為你送上驚喜，因為佢哋default冇呢個setting，直接講佢知妳想點，至少唔駛因為佢冇為妳製造驚喜而失望。

4. 討好他的親朋好友
帶得妳見親朋好友，證明佢對妳已經相當信任，唔會期望妳好似公關咁逢人 social，反而會以妳為本，擔心妳：「佢喜歡我嘅父母（朋友）嗎？／佢會唔會被大家悶親呢？」。因此，如果妳係個內向慢熱嘅美女，可放心繼續被動文靜，只需保持微笑，佢絕對唔會怪妳冇主動討好各位。相反地，女人帶男友見家長（朋友）則期望佢可以討好大家。點解有咁大分別？因為一般女人都鍾意做debriefing囉！

5. 不足的性生活
如果男人拒絕跟自己做愛，女人可能因此而非常困擾兼自責化，將原因歸咎自己唔夠性感唔夠靚，最後索性拒絕再「做」……相反，男人若然被女人拒絕，當刻固然唔係咁爽，但由於佢哋天生係獵食者，加上傳媒電影雜誌等等提倡房事應由男人主動，所以他們唔會因為被拒絕而鑽牛角尖，反而會更努力再接再厲。