森美專欄:愛情就像買演唱會飛一樣,點解?

By COSMO


人對付出嘅概念有時好唔同,舉個例,你用咗$400買張演唱會飛,但你唔小心跌咗,你會唔會再畀多$400去買呢?大部份人都唔會,因為咁張飛就變咗$800,好唔化算。但如果你係去買飛途中跌咗$400,咁你會唔會因為咁而唔買飛呢?咁就大部份人都會照買喎!因為好多人會覺得跌錢還跌錢,買飛還買飛,兩樣野唔關事。

 

其實兩個情況都因為買飛而唔見咗$800,喺金錢上係無分別,只係喺概念上出咗兩種諗法,但就會影響到你仲畀唔畀錢去買飛。

從呢個例子,就知道人有時會頭腦唔係咁清晰,唔係咁明白點解會做某啲選擇。

愛情上都一樣,有啲人唔敢嘗試拍拖,怕揀錯咗會嘥時間,又怕揀咗一個就要放棄哂其他所有人。其實如果你轉一轉概念,就會諗到你冇拍拖,其他選擇喺度,你有拍拖,其他選擇都一樣喺度,所以你其實係可以拍住拖,抱住騎牛搵馬嘅心態去等更好嘅人出現。

「就是喜歡大叔」20 個年輕女生的愛情想法

你可能會覺得咁樣唔夠專一,唔夠完全投入,但如果你繼續保守,你只會繼續浪費光陰!其實只要你唔覺得拍拖就一定要結婚,咁樣騎牛搵馬至少可以幫你拍倒拖,咁你嘅選擇就會多好多!

好似頭先個例子咁,$800係冇梗架喇,但係點諗可以唔見咗$400都依然享受到演唱會,呢樣先係最緊要!

 

森美FB: https://www.facebook.com/903sammy
森美IG: https://www.instagram.com/sammy903/
森美微博: http://weibo.com/playtoy

工作聯繫: rockasammy@gmail.com

LOAD MORE