尋找女強人的緣份!分析下列5種男人

by 新北由紀



隨社會愈來愈文明,女強人就愈來愈多。
咩係女強人?即係才能出眾,專注事業而且極有成就嘅女性。

佢哋好叻,但喺情路上面,總係比較難行。

原因有三:
1.冇時間 2.有要求 3. 重計劃,但計劃總跟不上變化。


喺女強人嘅世界之中,計算太多,亦少咗年少對愛情嘅純真幻想。
但或者,有以下條件嘅男人,都值得你考慮。 


1.唔一定要叻過你!收入可以比你低、職位比你低,但唔會低太多 

好多人覺得男人要叻過自己,搵得多過自己。
但你可能喺職場已經好有成就,叻過你嘅人唔多,你嘅選擇變得好少。

而另一方面,叻嘅男人相反,愈叻愈多選擇。
於是女強人依呢個指標,會呈弱勢。

其實對方收入可以比你低,愛情唔需要太計較太功利,
但緊記:唔好唔係相差太遠。

因為價值觀會好唔同。
你覺得一餐食1000蚊算貴,佢覺得800算貴,咁都好相近。
但如果佢覺得200蚊已經貴。你哋嘅生活就好難同步。 

一旦唔同步,熱戀過後,好多現實問題就會將關係摧毀。

2.佢係一個烹飪高手 

可能你會覺得兩者冇咩關係,但其實好重要。
女強人多數忙,返到屋企半條人命,外面應酬太多又漸覺空虛。

如果呢個時候有個男人煲一碗熱湯、或者煎定塊扒,等你返嚟。
其實真係好窩心。

當然啦,有時佢忙你得閒,就到你入下廚房啦。


3. 就算係大男人,都一定要超細心


最好唔好係大男人,因為女強人喺職場上,始終養成咗少許霸道。
如果兩方都固執,好易進入瘋狂爭執期。

但男人本性就是大,唯有搵一個較細心,
知道幾時要讓下你,幾時要畀你發下脾氣。


4. 擁有一項特異功能


當然唔係講緊Super Hero嘅超能力,
而係佢有門技能或手藝,有一種過人成就。
雖然佢收入未必比你高,但都要有樣嘢,令你尊重,令你佩服,令你安心戀上。

未必好複雜,可能簡單到知道天上唔同星座位置,
有時可以拎住個望遠鏡同你數下星宿,已經足夠。


5. 擁有「心事台」功能


女強人,強於外、弱於內。
佢嘅另一半,需要係好識聆聽他人,仲要令你好坦然咁將心事話畀佢知。
24小時,無時無刻,都收納你嘅感受,陪你一齊承受。

LOAD MORE