藍橘子專欄：4個旅行時，男友令人最討厭的行為

去旅行本來就係一件將平日工作壓力大解放嘅事，同伴侶去旅行更加係令感情昇華嘅好方法。但隨行嘅伴侶，總係會做出幾件令你連去緊旅行都要爆血管嘅事。

1. 朝早唔願起身

男人永遠唔會理解，點解女仔要凌晨機飛去韓國，就係想爭取每一分一秒。但伴侶朝早總係唔願起身，令到行程延誤，仲有啲景點被逼取消。以男人角度，去旅行就係休息，返工已經早起身，放假唔應該咁辛苦自己。

2. 不如我坐Coffee Shop等你！

台灣、韓國、日本都係購物聖地，但周街都係Coffee Shop，就好似「購物女友等候區」咁，男友一見到咖啡室就想入去，等到女友Shopping完先返嚟搵佢，都唔知一齊去旅行有乜意思。男人角度，去旅行最緊要輕鬆，坐喺Coffee Shop一日，完全唔覺得有錯失啲咩。

3. 唔肯執行李

將自己戰利品整齊排列嘅張床上面，影完相先執返落個行李箱，係女性必定程序。相反男人唔鍾意執行李，頂多只會將「著過嘅衫」同「未著過嘅衫」分成兩邊，塞晒入行李，就代表執完行李。男人角度，到最後一刻先執都未遲，買得多嘢先會唔夠位，自作自受！

4. 唔負責Plan行程

做過旅遊搞手就知道，要Plan行程嘅壓力有幾大。就算同男朋友兩個人去旅行，話事權可以大少少，都想令男朋友開心。但佢就完全將呢個責任交晒畀你，去到旅程途中一句「乜又係行商場啊？」就一瞬間火山爆發。男人角度，其實要求唔太高，一日行街、一日睇風景，每三個鐘有休息時間，早啲畀我訓覺同食飯就滿足。