藍橘子專欄：做齊5件事，代表你哋係老夫老妻

當兩個人一齊耐咗，伴侶會變得愈重要，想無時無刻都同佢一齊。《志明與春嬌》有句說話，春嬌愛志明愛到無法自拔，甚至連自己都唔察覺到，被志明影響到，變得愈來愈似張志明。其實生活上好多細節，都係一種「愛得無法自拔」嘅象徵。

１）食到好西，會即時諗起佢

當你同朋友試到一間好食嘅餐廳，或制街發現有新餐廳開張。腦海就會不期然諗起佢，記低個地址，下次一齊試食，搵啱兩個人都喜歡嘅口味，將一間新餐廳，變成屬於兩個人嘅「老地方」，都係一種情趣。

２）被窩放屁



當一齊日子耐咗，就愈來愈唔注重儀態。雖然放屁呢件事唔係話忍就忍到，但發現（尤其係女方）特別鍾意喺被窩入面放屁，畀伴侶感受一下自己嘅「愛的味道」。甚至聽過為咗同伴侶一直傾計，喺屋企大便都唔會閂門。

３）叫對方全名

作為伴侶好多時會幫對方改一個花名，加個豬、屎、屁、臭、肥字…但再進化到另一個層次，就會叫返全名。仲要喺街頭大大聲，驚死其他人聽唔到，因為覺得叫全名先有親切感。

４）瞭解對方缺點

熟悉到某個程度，唔單止瞭解到對方有咩缺點，就連對方心思都可以猜透。例如你知道佢無記性，落雨一定唔記得帶遮出門口，你會打電話提醒佢，聽到佢回應有少少敷衍，就知道佢打緊機，根本無心裝載，於是，命令佢立即將把遮放入袋。

５）愈來愈少鬧交

呢個亦係情侶間最難跨越嘅障礙，當非常瞭解伴侶個性，知道對方點解會嬲，因咩事會動怒，底線去到邊，就能夠避免好多鬧交嘅慘劇。難度高嘅原因，係因為要雙方同時進行，對方一樣會尊重你，唔會故意講／做出令你動氣嘅事。