《逆緣》係港版美國隊長?拆解「解凍阿爺」陳家樂究竟係邊個?

《逆緣》係港版美國隊長?拆解「解凍阿爺」陳家樂究竟係邊個?

陳家樂係邊個?英皇藝人?余香凝男友?一部《逆緣》,唔單只陳家樂個角色解凍,就連佢本人都走出雪櫃,終於有機會畀大家知道佢係邊個。原來佢係同陳偉霆同期;曾經有機會加入Sun Boy’z;單挑彭于晏崔始源;同趙碩之談情,同惠英紅鬥戲⋯⋯

By COSMO

1)余香凝個男友⋯⋯⋯

如果唔係《逆緣》,大概大家都唔係好記得陳家樂,又或者較有印象,就係佢係余香凝個男友。話說三年前因為拍港台劇集認識余香凝,之後拍拖至今,仲開到聲經已認定對方係結婚對象,計劃5年內拉埋天窗。

2)與陳偉霆同年新秀⋯⋯

講番陳家樂本人,佢係2003年英皇新秀入行!嘩,2003年有邊個參賽呀,冠軍係William Chan陳偉霆呀,雙陳對決之下,陳家樂輸咗都冇法子啦!

3)本來係Sun Boy’z成員⋯⋯

即係咁,好記性嘅都會記得,想當初嘅William,除咗係的士陳之外,唔係講佢同過Angelababy拍拖果單呀,而係佢係Sun Boy’z成員。原來,陳家樂當初都曾被列入Sun Boy'z候選人,但佢跳舞甩beat,覺得自己唔掂,排舞都唔去,自我放棄咗。

4)當年同趙碩之做幕前情侶,之後⋯⋯

入得英皇,梗係有唔少機會。就算唔跳舞唔唱歌,都大把戲拍啦。十年前先喺TVB拍咗《盛裝舞步愛作戰》,話晒都係第二男主角,劇中仲同當年冒起嘅趙碩之做情侶。點知年少氣盛,覺得自己好掂,之後拍電影《很想和你在一起》(與洪卓立、詩雅主演),幾乎唔跟劇本咁演,最後冇人再搵佢拍嘢,投閒置散,直至麥曦茵搵佢拍《DIVA華麗之後》,差唔多雪咗3年先解凍。

5)《破風》香港代表,力撼彭于晏崔始源⋯⋯

即使解凍,都唔代表陳家樂有運行,繼續介乎半紅不黑與不紅好黑之間。好似林超賢導演嘅單南電影《破風》,超大型運動電影,集合中台韓型男,分別有竇驍、彭于晏、崔始源,而香港嘅代表就係陳家樂!點知佢拍拍下又炒車,胸骨骨折,角色又唔討好,相信而家都冇乜人記得。

6)《幸運是我》腦退化惠英紅個衰仔⋯⋯

要講近年陳家樂較多戲份嘅演出,應該係惠英姐再拎影后嘅《幸運是我》,戲入面果個旭仔。雖然掃獎果個係紅姐,只不過紅姐都係咁讚陳家樂,而佢仲難得咁獲得「第11屆華語青年影像論壇年度新銳男演員獎」,都算好大突破喇!

LOAD MORE