feature

痛過後成長!伍詠薇21歲經歷前夫過身、47歲老公出軌:唔驚得咁多,女人要自在

痛過後成長!伍詠薇21歲經歷前夫過身、47歲老公出軌:唔驚得咁多,女人要自在

49歲的伍姑娘伍詠薇最近於《飛虎之潛行極戰》飾演黑社會大家姐,一頭短髮剛練有型,同吳岱融做對手戲,不失霸氣。劇中,他被吳岱融背叛、爸爸更因而被殺,故事後期又被兒子黃宗澤「出賣」。現實生活中,伍姑娘老公練海棠被揭出軌,與劇中不同的是,她沒有仇恨,反而選擇積極面對及包容。

by COSMO

1.與老公練海棠相處係膽博膽

伍姑娘日前接受商台節目《一圈圈》訪問,剖白自己的感情事。伍詠薇與老公練海棠1999年結婚,結婚19年,當年二人認識了八個月就結婚。伍姑娘一直認為自己是「野馬」,從未想過跟同一個男人可以相處這麼多年。她用「膽博膽」來形容關係,「好到幾時就幾時,你可以包容對方,但佢又係咪可以包容你的缺點呢?」伍姑娘熱愛拍戲,過程會想很多東西,當中包括離婚,她表示如果將來就算同練海棠離婚,對方仍然會是自己最好朋友,「雖然我未必接受佢老婆」。

2.冷靜應對老公出軌事件

伍姑娘一向予人大癲大肺、好玩得之感,2016年老公練海棠被雜誌揭發出軌,伍姑娘收起搞笑本色,冷靜應對完全令人配服,不單畀足面老公,更平靜向公眾交代,處理得體。

練海棠一而再出軌,伍姑娘撐到出面,當人人都以為伍姑娘縱容老公,伍姑娘就重申:「我無隻眼開隻眼閉!要我『隻眼開隻眼閉』,你會睇得出我係唔舒服嘅。我點解要『隻眼開隻眼閉』?有啲人會死頂,但我唔會!」伍姑娘表示當看到出軌報導後,第一個感覺係起雞皮,之後就決定要與老公坦白,有咩都要三口六面講清楚。「乜都要傾,可唔可以繼續走落去?發生咩事,就算佢呃我都要講。」伍姑娘認為一方出軌,另一方都有不足:「其實我自己都有責任,嗰個階段我好鍾意拍攝工作,變咗比較少時間陪佢。」

3.「比人揭穿咪蠢囉」

伍姑娘曾告訴老公:「你一係就呃晒我,你呃唔晒,比人揭穿咪蠢囉。」最近一次出軌報導,伍姑娘就同老公講:「走唔甩啦!唔係我睇到,係記者發現!」坦言好心痛、好失望的伍姑娘,冷靜過後這樣想:「結婚時承諾生老病死,未必做得到,但我盡做。老公係我揀嘅,與其諗係唔係一面倒佢錯,倒不如檢討吓自己有冇錯。我呢個人係傻,但我都好均真、好包容,所以我覺得發生呢種事,當中我都有問題。唔係話相唔相信佢,我信呢件事屬真,但件事發生咗,我係要去包容佢、再同佢相處,坦誠溝通後,再睇吓我哋可唔可以再一起走落去。」除了自我檢討外,伍姑娘亦抽多了時間陪對方,她說如果到最後都要分手,她並不會介意,至少自己努力過。

4.年紀相差31年的前夫 結婚十幾日就去世 被鬧為劏豬凳

節目中,伍姑娘還透露前一段婚姻的委屈。1989年,伍姑娘參選亞洲小姐競選,雖然最後落選三甲,但同年簽約亞洲電視而出道,任職初期更被公司點名力捧並順利成為亞視的當家花旦。1990年,伍姑娘與年紀相差31年的首任丈夫翁江培結婚,可惜於婚後13天,翁江培於陪同她到深圳登台期間,因心臟病發猝死,當時伍姑娘只有21歲,年紀尚輕,便遭逢巨變,真係生命中不能承受之重。不懂應對的伍姑娘說:「嗰時結咗婚十幾日,丈夫同佢嘅家人同幾位朋友就陪我去登台。嗰時我都未唱完,我先生突然離場,我仲以為佢可能想出去呼吸新鮮空氣、去一下廁所。點知唱完後,屋企人就同我講:『佢突然唔舒服、抖唔到氣,依家去咗醫院。』到達醫院,已經睇到佢喺度進行心臟電擊搶救,之後醫生就同我講:『呢個人已經離開咗。』」

5.前夫死後受盡委屈

翁江培離世後,外界一直盛傳伍姑娘繼承了亡夫的一億七千萬遺產,並附隨一連串難聽的說話。「冇呢件事發生過,一直被屈。當時周圍啲人都變咗編劇,話我剋死佢、『劏豬凳』、話我『有一億七,都唔使出嚟拍戲!』」當中承受過多少委屈,通通有苦自己知,又唔敢同屋企人提傷心事。「鍾意我嘅人會覺得我強、我型,但唔鍾意我嘅人會覺得我好討厭。我試過喺街上竟然有唔認識嘅人鬧我八婆,我嗰幾年就係咁樣過。你依家睇我嬉笑怒罵,其實係感謝嗰幾年幫我練出嚟。」原來伍姑娘今天硬淨的性格,以及笑看風雲的本領都是從當天受過的傷痛磨練出來的。

LOAD MORE