王貽興專欄：有膽偷食、無膽公開！男人出軌與肺炎疫情竟有相關？

全球疫情嚴峻，人人自危，香港遲遲不封關，如果世上所有女人都跟政府一樣，對於偷食與疫情同樣採取Honor system，話係就係，零懷疑零求証，係咪湖北嚟？唔係。有冇發燒？冇。OK，過啦——哈哈哈，咁世上所有男人就開心晒咯。

政府天才高官除了叫巿民戴平光鏡、蒸口罩外，更叫大家減少接觸，不要接吻行房，以免增加感染機會。也許今年情人節會是香港開埠以來，餐廳以至時鐘酒店都最少生意最大鑊的一年。

明明之前爆房迫到要像茶餐廳等位般在外面攞籌等開波，今年你敢去，就算唔送套唔送番梘，都應該送個口罩以示感恩啦吓話？

武漢男帶小三遊韓播毒

關於疫情，有個小故事頗耐人尋味。話說內地有樁消息，某武漢男子隱瞞病情，堅持自己沒有到過真‧野味巿場，或者嗰種「野味」巿場，甚至不在武漢，但最後卻被發現中招，而且因為沒有申報，所以牽連不少人，原因何在？

原來這位武漢男子，向妻子聲稱到某地公幹，但其實偷偷帶了小三遊韓國，然後因為沒有戴罩，最後感染肺炎，起初堅稱只是普通感冒不適，後來確診患病，迫令其交代，才委婉道出自己跟小三遊山玩水，四處播毒，而小三至今仍然行蹤不明⋯⋯

封關揭露見不得光的關係

當年東莞熄燈，令很多向另一半訛稱在港，只是出去踢波傾嘢的男人一夕之間生死時速冒死衝關。今日武漢肺炎，內地各省巿自行封關，也令很多見不得光的關係一夜之間曝光，偷食事小，性命事大。

可惜很多人有膽偷食，卻無膽開誠布公，寧可隱瞞到最後一刻，到紙終於包不住火，累人累物，也不願及早悔改，回頭是岸⋯⋯

或許，天底下偷食的賤格男女都跟政府一樣，一樣死不認錯，寧願攬炒，都不肯面對過錯，亡羊補牢。