王貽興專欄：交友App撞到熟人點算好？單身男女應照用毋須怕醜！

歌手衛蘭被媒體問到年紀漸大，沒有對象怎麼辦，她說其實早前試過聽人講裝個交友app，但一開頭幾頁就畀佢見到唱片公司男同事，當堂嚇親，立即刪App，唔敢再用云云⋯⋯

其實開app撞到熟人又有咩好驚，你打機遇到識既人上線或者同一公會其實都不需大驚小怪，同枱食飯尚且各自修行。

使用交友App需謹守原則

喺同一個app度，都係各自搵食啫，唔好有食錯冇放過，謹守呢度食唔好呢度屙嘅道理，就自然無往而不利啦⋯⋯

儘管很多人都以為這些交友app都是單身男女玩開多，但原來真正常用的，是那些明明已有另一半卻想呃蝦條食快餐的食家，以及已經結了婚但深閨寂寞，呃水吹，想從陌生男人嘅追求度尋找新鮮感同滿足感嘅女人。

佢哋程度亦有深淺，明智既就只係返工時間開嚟呃水吹，點講都唔會出嚟見面，只係傾吓偈殺吓時間；但沉咗船或者慢性中毒嘅，就唔會只滿足於言語快感滿足，開始約出嚟食飯睇戲，甚至開埋房上埋床，做埋SP都未定⋯⋯

其實即使被人發現自己用呢啲app都無咩需要羞愧，正如求助婚姻介紹亦係好正常好合理既需要，如果係有頭有面有人識既，咪話自己account畀人hack咗囉，大家心照，沒甚麼大不了。

別沒殺擴闊交友圈機會

如果正常途徑識唔到人，唔用呢啲方法擴闊社交圈子，唔通為保所謂名聲，一世就咁樣蹉跎？反正呢個世界永遠都係以結果論嚟睇人，你成功出pool，搵到個好嘅伴侶，邊有人仲計較你嘅手段？就算有，啲人都當佢哋係酸葡萄，使咩上心？

關於交友app識人，內地有單嘢先爆，話說有新抱不滿當年奶奶響佢坐月果陣恰佢鬧佢，竟然用假account扮成另一個中年男人approach佢奶奶，傾咗大半年，傾到有真感情，然後約佢奶奶出嚟，喺後巷捅佢想殺咗佢⋯⋯

咁如果衛蘭平時對佢唱片公司既男同事好地地，應該又唔驚畀人捅嘅講真。