以你的名字呼喚我的姓氏?記住呢位小鮮肉準影帝Timothée Chalamet

以你的名字呼喚我的姓氏?記住呢位小鮮肉準影帝Timothée Chalamet

今年奧斯卡嘅浪漫電影,除咗《忘形水》之外,仲有《以你的名字呼喚我》(Call Me By Your Name)。我知我知,呢部係gay片,但其實都係想講初戀,同埋focus喺兩個型男主角,其中後生啲嘅小鮮肉Timothée Chalamet,更加得到唔少影帝寶座,仲提名今屆奧斯卡最佳男主角,有機會成為歷年來最年輕影帝!所以快睇佢嘅小百科,認住呢塊嫩肉!

by 二弟

1)22歲混血仔

介紹番,Timothée Chalamet,1995年12月27日紐約出世,即係22歲仔,嫩!

2)混血仔

美國出世,但有好多國家血統,老豆係法國人,媽咪係俄羅斯猶太同奧地利猶太血統嘅美國人,難怪溝得咁靚仔。

3)演藝世家

演技好並唔係偶然。家姐、阿叔、阿公都係做電影或者電視,演藝細胞簡直入晒血!

4)我愛足球

童年嘅我的志願,唔係演戲而係踢波,想成為一位偉大嘅足球員。13歲時,更加做過足球學校嘅教練,教6至10歲嘅細路踢波。直至上到高中學表演之後真正愛上,自此就以演員為理想喇!

5)童星出身

你以為22歲就演技稚嫩green到爆?查實佢少男時期已經演戲,做過美劇《律政風雲》,長大後一路有拍戲,例如美劇《國土安全》、電影《星際啟示錄》。

6)得獎無數

今次喺《以你的名字呼喚我》擔正飾演初嚐戀愛滋味嘅青春少年Elio,經已贏咗「第21屆荷李活電影獎」最具突破男演員獎、「第27屆哥譚獨立電影獎」最佳突破演員獎、「第83屆紐約影評人協會獎」最佳男主角等等獎項,嚟緊仲得到奧斯卡提名,越級挑戰影帝寶座!

7)特登學意大利文

為咗要扮意大利少年嘅角色,佢提前5個禮拜去當地準備,每日分別用1.5小時學意大利文、練結他同彈鋼琴,每個禮拜又用3日健身,保持最佳狀態!原來佢一早有6年結他同鋼琴經驗!

8)長鏡頭點拍?

最令人印象深刻,當然係Timothée喺戲中結尾望住火爐喊足幾分鐘嘅長鏡頭,原來total拍咗3個版本。佢話當時拍攝果陣,同樣聽住配樂一樣,非常投入角色心情,所以好易喊得出。

9)有排你睇

嚟緊小鮮肉長拍長有,包括即將上映、同為奧斯卡熱門電影《不得鳥小姐》(Lady Bird)、Scott Cooper嘅印第安人題材電影新作《Hostiles》、Woody Allen新片《A Rainy Day in New York》等等!

10)放心,佢係直嘅!

係咪擔心小鮮肉咁完美嘅時候,其實佢同戲中一樣係gay?錯喇,佢百分百直仔,曾經同Madonna個女Lourdes Leon有過一段情,嗱,唔駛驚啦!

LOAD MORE