情人節點過好？有伴侶嘅都不外乎係同另一半享受吓二人世界：行街、睇戲、食飯、或者簡簡單單喺屋企hea吓。但係對於單身嘅人嚟講，情人節或者會係一個折磨，單身狗除咗要忍受無間斷閃光彈之外，餐廳食店都熱推二人套餐，情人節一個人真係唔知去邊好......其實一個人唔一定「空虛、寂寞、凍」嘅，韓國插畫家Aeppol就選擇勾劃出「一個人」嘅浪漫幸福生活。
登入 瀏覽本網站，可獲取積分換領專屬優惠
Aeppol筆下「一個人」的幸福帶領每一個觀賞者品嚐生活當下，所有畫面場景都會經常出現喺你我身邊，係一啲生活小日常，透過微小嘅生活細節傳遞幸福嘅本質，加埋可愛嘅小動物，令作品更加甜蜜。
究竟係咩驅使Aeppol創作呢啲「一個人」幸福系列呢？你或者會猜測或者會係因為失戀，所以Aeppol嘅畫作都係圍繞「一個人」。但係原來創作靈感同Aeppol感情生活完全無關，佢透露當初創作動機係源自城市人嘅繁忙生活。
都市生活急促忙碌令人好容易忽略生活細節，所以佢希望透過畫作讓人「慢」落嚟，利用佢一個人嘅繪畫視角帶俾觀賞者更多啟發。與其忙碌咁搵「對的人」，不如我哋都先學識感受幸福嘅能力，然後好好地愛自己。
作品一：病了就好好休息
休息對都市人嚟講可能係一件好奢侈嘅事，每日都生活馬不停蹄咁工作，好多人都話「得閒死唔得閒病」就算真係病咗都繼續chur。但係病咗就好應該靜靜休息，好好對待自己嘅身體，然後慢慢恢復健康。
作品二：一個人去旅行
去擴闊自己嘅眼界，千祈唔好俾感情或者工作限制咗你嘅世界。邊個話去旅行一定要有伴？一個人去旅行行程節奏全部由自己決定，係完完全全嘅自由自在。
作品三：用閱讀投入另一個世界
唔好停止學習同想像，而閱讀係一樣好好嘅興趣讓你可以無止境學習。當你每打開一本書都係一個全新嘅世界，全新嘅故事，而你就係主角。
作品四：也別忘了吃貨
得閒放縱一吓，然後好好獎勵自己去食最好味嘅嘢食。食到好味嘅嘢都係一個令自己開心嘅方法。
作品五：發一個好夢
呢種甜蜜或者好短暫，但絕對足夠令你甜滋滋一整天。有人話發夢好多時係反映你嗰排諗咩，唔知你同唔同意呢？
作品六：偶爾好好打扮一吓
雖然係單身，但作為女孩子偶爾都幫自己好好打扮一吓吧，自信心當堂返哂嚟！好多時扮靚並唔係為咗取悅別人，而只係為咗令自己開心。
作品七：感受大自然
生活或許有太多煩惱太忙碌，但周末如果有時間就好好比自己輕鬆一吓，而去感受大自然絕對係最好嘅活動，抬頭看看藍天，再看看周邊嘅小動物，你會發現平日忙碌嘅生活實在令你忽略太多......
立即訂閱接收Cosmo最新潮流資訊
訂閱電子報，獲得更多資訊、體驗及禮遇