feature

貼地情侶!木偶哥林師傑年尾迎娶歐陽巧瑩:我已經搵到我嘅世界

貼地情侶!木偶哥林師傑年尾迎娶歐陽巧瑩:我已經搵到我嘅世界

星夢歌手「木偶哥」林師傑與無綫《3日2夜》咪神歐陽巧瑩拍拖3年,一向甜甜蜜蜜,上年年尾林師傑更求婚成功,今年年尾擺酒。一齊睇下佢地嘅甜蜜瞬間!

by Cosmo

1.屋企走廊求婚

29歲的林師傑與24歲的歐陽巧瑩,猶如一對小情侶,連求婚過程都單純過人。話說林師傑2年前已看中一隻戒指,當他們決定結婚時,他就帶埋歐陽巧瑩一齊去買,因為他知道女友一向不喜歡驚喜。不過,他沒有即時求婚,戒指就這樣放在大廳當眼處2個月,歐陽巧瑩說每晚都見到。

直至有一晚,二人談天,回憶3年來大家一齊經歷好多、進步好多,亦在對方身上學到好多嘢,不只是情侶,更加是靈魂伴侶。林師傑覺得是時候了,就在廚房走廊求婚,好隨意,而歐陽巧瑩也戴起戒指!歐陽巧瑩好滿意這個求婚過程:「成件事好舒服!多謝佢送咗自己畀我!」

2.不被外界看好 女堅持追男

3年拍拖歲月,二人一直不被外界看好,皆因林師傑形象花弗,歐陽巧瑩則狂野性感。林師傑指一開始not right timing,他剛與前女友分手數月,歐陽巧瑩又剛入行,怕戀情影響她發展。

不過歐陽巧瑩無懼一切,堅持及主動追他,所以林師傑當時開出3個條件,一是要她照顧自己不要讓他擔心,二是他的時間分配以工作及家人為先,三是最後才到她,沒想到歐陽巧瑩都答應。現在回想,林師傑都覺得自己幾苛刻,歐陽巧瑩卻沒感覺委屈。當然,林師傑現在的人生排序完全改變:「只要她在身邊,不論環境怎樣差,心中都感到富有。」

3.為林師傑護航:「我一定會幸福快樂 因為我已經搵到我嘅世界」

對於婚訊,有一些人因林師傑形象麻麻而替歐陽巧瑩擔心,她卻對男友一百分信任,為男友護航,在社交媒體說:「第一:我嘅另一半係好係壞,我相信我一定比你清楚,因為你只係一個陌生人,有乜資格去批評同判定人?第二:有朋友同我講『點解唔搵個好啲呀』『You deserve better』 除咗冷笑之外,我畀唔到反應。一個人孝順與否,唔係取決佢有冇成日post家庭照。一個人工作勤力與否,唔係取決於佢每日都出幾post話自己做嘢要比心機。一個人心地好唔好,唔係取決於佢出post 話自己扶阿婆過馬路又或者餵流浪貓狗。你可以選擇留喺網絡世界度,去認識去欣賞一個人(即使你所欣賞嘅,都有可能只係包裝),不過我就會選擇用真心 用時間去了解去認識一個人。」歐陽巧瑩好有信心呢個男仔係一個可以付託終身的對象,林師傑聽到實冧爆啦,有個咁撐自己的未婚妻。

4.11月23日拉埋天窗

星夢老闆何哲圖鼓勵林師傑求婚,知道林師傑求婚成功後,更幫他們擇好日子,於今年11月23日註冊結婚,呢個老闆唔話得!

林師傑忙於拍劇,婚禮的籌備事宜可能都要全交給女友處理,他大讚女友精打細算,每天都拿著紙筆計算成本,井井有條。歐陽巧瑩已搵齊姐妹團,包括朱晨麗、蔚雨芯、麥美恩及劉佩玥,她搞笑表示不少朋友都有要求姊妹裙要性感一點。而林師傑則還沒聯絡兄弟團,因為想找一些很重要的人作兄弟,自己還在儲膽量去邀請他們,巨星幫班底走唔甩啦。

5.慳得情侶

歐陽巧瑩和林師傑這對小情侶,一直非常貼地,拍拖開餐平民化,曾被影到在Elements吃壽司和拍拖入超市掃零食,情人節也只去合成吃糖水撐枱腳。

估唔到連籌備婚禮都同一眾80、90後一樣,慳得就慳。林師傑為婚禮申請了4張信用卡儲asia miles,希望度蜜月可以靠miles換機票,而巧瑩就日計夜計點樣可以慳啲。由於林師傑主持的節目被cut,收入又少一半,所以要慳得就慳!

LOAD MORE