登入 瀏覽本網站，可獲取積分換領專屬優惠
點擊查看專屬優惠
男朋友最怕女朋友問「情人節，你會送咩畀我？」
問得呢條問題即係話，好可能你心入面已經有嘢想要，但好可惜其實男人最怕估女人諗乜，你問佢會送咩畀你，第一，佢好有可能即時答唔到你；第二，佢好有機會根本無諗過要送咩禮物俾你；第三，佢有極微可能已經一早安排好諗住俾驚喜你，但你咁問到，佢可能要即時諗個藉口，支支吾吾嘅時候可能你又已經誤會佢未諗或者無諗，想避免鬧交的話，就唔好問得咁直接喇！
建議女朋友可以先發制人
你可以先發制人講你自己預備送咩俾佢，講到你預備得幾辛苦之後，再加一對楚楚可憐嘅眼神問：「咁你呢？」，除非佢係渣男，否則係男人聽到另一半咁為自己都會心軟，呢個時候如果佢無預備或者未諗一定會喺內疚之下和盤托出，咁你就可以要求補償要你想要嘅禮物！
男朋友最怕女朋友問「你可唔可以俾啲驚喜我？」
「驚喜」相信都係好多男朋友同老公會遇到嘅難題，初初一齊對方做乜都係驚喜，一齊耐咗精心預備嘅都變成理所當然，所以當你喺大時大節之前想問男朋友或者老公：「你可唔可以俾啲驚喜我？」其實就好可能係你已經覺得無論對方做咩都已經變成理所當然！
建議女朋友可以玩估禮物小遊戲
想令對方俾驚喜你，唔一定要單刀直入咁要求，你可以提議同對方玩個小遊戲，互相為對方準備一樣有意義嘅禮物，但要估中個意義先可以得到，呢類小遊戲開宗明義係送禮物，但其實禮物係咩根本唔重要，最重要係個意義同估嘅過程，可以增加情趣之餘，又可以知對方有幾重視自己，比起港女指令式嘅要求，相信另一半會對你更心甘命抵！
男朋友最怕女朋友問「你諗住帶我去邊度玩？」
過時過節少不免想外出慶祝，但其實香港有幾大，問對方想帶你去邊度玩其實呢個問題難答度係100，對方有機會仲會回應番你：「咁你有無邊度想去？」之後又好可能展開罵戰，所以與其鬧啲不必要嘅交，不如試吓唔好咁問！
建議女朋友可以自己構思拍拖日程
情人節去邊都唔係重點，重點係抱住一個咩嘅心態去玩，可以試吓由你自己去構思一個拍拖日程帶領對方去，對方少咗要諗帶你去邊度玩嘅壓力，自然會同你玩得投入啲，分分鐘仲會引起佢嘅創意同你嚟個即慶之旅！
男朋友最怕女朋友問「你同你以前啲女朋友點過情人節？ 」
呢個又係男朋友嘅死穴，講你知又怕你嬲，唔講你又繼續問，其實倒番轉，如果男朋友咁問你，你又會點答呢？以前同前度係點已經唔重要，比較只會令自己越嚟越無自信，重點係佢而家係同你一齊，如果真係在意對方，不如好好活在當下，呢個問題就慳番吧！
女朋友可以用旁敲側擊方法知答案
如果真係好想知嘅話，可以試下用旁敲側擊嘅問法，如：「好多人情人節都會大事慶祝，你有無試過啊？」或者「有人會送好貴禮物，又食好貴一餐，你會唔會覺得好拜金？」只要唔提前度兩隻字同你自己嘅感受，男人都會好容易喺無防範之下同你分享！
男朋友最怕女朋友問「你送嘅花有咩特別花語？」
有花收喺情人節嚟講已經係好過好多人，如果仲咁貪心，就真係想撩交嗌，有時候做人女朋友同老婆都唔好去得太盡，因為對男人嚟講肯課金去送花俾你可能已經係好有誠意，除非佢一向好細心，如果唔係，就唔好咁強人所難，知道佢剩係送畀你一個，當你係唯一就足夠了！
女朋友可以自己尋找答案
花語對男人嚟講應該真係難，如果真係好想知佢點解買呢紮花，可以試下問：「你之前未買過呢種花俾我嘅？」或者可以問「呢種係咩花嚟架？」然後自己搵個花語出嚟同佢分享，都係另一種情趣！
其實男人對愛情很多時在於行動，奈何女人對愛情往住在於說話之中，若果不想情人節無端端被分手，就請務必管好自己張口，免得說得過多而招惹無妄之災。
立即訂閱接收Cosmo最新潮流資訊
訂閱電子報，獲得更多資訊、體驗及禮遇