閨密，一齊開心，一齊傷心，一齊買衫睇戲，一齊減肥，但又可唔可以一齊隱瞞事實？
登入 瀏覽本網站，可獲取積分換領專屬優惠
點擊查看專屬優惠
無錯，一次不忠，百次不容，但愛情同姊妹情係兩碼子嘅事，佢出軌並唔代表佢同你嘅友情會就此破產。如果你覺得佢既然做得出出軌嘅行為，亦即代表佢為人不負責任，無道德觀。其實有此等想法只係代表你為人偏激，愛情同義氣實為兩件事，即使其行為會令你覺得佢誠信破產，但一單還一單，對男友不忠，亦唔代表佢對友情唔專一，所以切記唔好用呢件事去判定兩個人之間嘅友情！
「你點可以咁對你男朋友？」、「如果你男朋友有第三者你會點？」無錯，打者愛也，因為你緊張佢，所以你會緊張埋佢所有嘢，但問題係，第一時間判官上身係咪可以解決問題先？所以無論你係從咩途徑得知閨密出軌時，第一時間都要冷靜諗諗，點解佢唔第一時間直接話你知？明顯就係怕會受到你嘅批評同責罵，未聽先判係最錯又最令人反感嘅行為。嘗試靜心聆聽，俾佢覺得你係一個樂於同佢分享心情嘅聆聽者，而唔係一個只係識得批判人嘅愛情專家。話唔定喺真情對話中，你可以搵到幫佢解決問題嘅方法。
就算做一世閨密，都唔代表你要盲撐對方。只係你更加要先了解成件事嘅來龍去脈，可能對方經歷緊無言喻嘅心酸同掙扎，始終出軌並唔係一件樂事，會做出呢種行為，可能背後有不為人知嘅動機。所以身為好朋友嘅你，更加要第一時間關心對方嘅心理狀況同情緒。所以未了解成件事之前，最好都係保持中立，始終友誼嘅價值，唔係以「隱瞞事實」同「支持」維繫。
出軌行為未必人人可以接受，呢點可以理解，所以你可能會因為難以接受而希望暫時無辦法同佢繼續好友關係。但正所謂家醜不外傳，雖然唔再係朋友，但都唔可以將人家嘅感情事周圍同人講，將出軌之事作為友儕間嘅gossip topic或分化武器。感情之事各人有各人嘅處事態度同想法，都係果句，就算感情唔專一，亦唔足以判斷佢人格有問題。搞分化，只會再一次證明你不問情由就妄下判斷，此行為不見得比出軌更有道德同負責任！
立即訂閱接收Cosmo最新潮流資訊
訂閱電子報，獲得更多資訊、體驗及禮遇