「佛系情侶」合久必婚!不覆msg不親熱不慶祝,緣份到了自然會結婚?

「佛系情侶」合久必婚!不覆msg不親熱不慶祝,緣份到了自然會結婚?

潮流興「佛系XX」,乜鬼都係「佛系」,真係「佛都有火」。你估真係「年輕得剃度誰亦能像波惹般乾脆,快活到半日也像活佛一百萬歲⋯⋯」咩?咁多種佛系,最憎「佛系情侶」:不打電話 不覆msg 不親熱不送禮物 不慶祝節日 不去旅行緣份到了 自然結到婚

By COSMO

#不打電話

電話最原始嘅功用,就係打電話、講電話。只不過而家講電話大聲啲都驚嘈親人,結果講電話都少咗。問題係,佛系情侶唔傾電話,唔係實時你問我答,根本兩個人都唔係同步,點拍拖呀佛你個系?

#不覆msg

Send msg對方已讀不回,向來最忟憎,如果另一半唔覆,都唔知佢真係忙緊,抑或陪緊第二條女食飯出街定搞緊咩。覆msg都唔著緊,真係是但啦算數啦唔煩你啦無人錫我啦,再見啦無野啦實在夠啦你唔愛我啦!

#不親熱

曾經有個好MK偉大嘅導演講過:「十個男人九個滾,剩返一個仲諗緊。」男人血氣方剛,親熱都要等一等,一定有景轟。有種佛系情侶,不牽手不親咀,你估真係「亦能陪我下半生」?

#不送禮物

男人最鐘意話:「都老夫老妻啦,乜都送過晒,仲送乜鬼?」之但係,有乜事就話買嘢獎勵自己,過時過節會買嘢送畀阿爸阿媽,去旅行會諗買手信送畀同事,又或者佢根本連旅行都唔想去,徹底佛系,真係佛都有火!

#不慶祝節日

同樣道理,節日一到,男人又話:「節日係最呃錢,慶祝乜鬼?」平日返工返學都已經夠慘啦,就連節日都唔慶祝下,困喺公司或者唔出街唔見面咁如常生活,呢種情侶邊有將來呀?將來咪又係佛系心態,結又得唔結又得,分手又得,唔分住又得!

#緣份到了自然會結婚

之但係,信佛者隨遇而安,深信緣份到了,自然會結婚。同樣道理,既然都係相信緣份,其實「緣份到了,自然會分手」一樣成立,不過唔怕啦。春天分手,秋天會習慣,苦沖開了便淡。佛系丫嘛!

LOAD MORE