有啲男人就係鍾意刺激，又抵受唔住寂寞，總係要暪住女朋友，去偷食。成世人流流長，雖然係會遇上幾個渣男，但係女生們都要帶眼識人，如果佢有偷食嘅跡象，咁就要諗諗計喇。
登入 瀏覽本網站，可獲取積分換領專屬優惠
點擊查看專屬優惠
偷食跡象1：會突然消失幾個鐘
偷食男就係會偷偷地去見小三，但係有咩時間最岩？應該就係lunch time又或者放工之後喇。
佢哋見面嘅時間唔長，但係偷食男喺個段時間一定唔接電話，亦都唔覆msg，人間蒸發幾個鐘，問佢去咗邊又支支吾吾，咁大概估到係咩事啦。
偷食跡象2：電話一定跟身
對於偷食男，電話仲緊要過個銀包，緊係啦，電話係同小三聯絡嘅重要證物，所有「犯罪紀錄」都喺晒入面，假如佢電話一定會跟身，去邊都唔放低，連沖涼都拎埋入廁所，咁就真係好大可疑。
又或者喺你面前，佢好少拎個電話出嚟，因為佢怕小三突然搵佢，然後俾你睇到。
偷食跡象3：對你忽冷忽熱
如果佢突然間對你好冷淡，興趣大減，又成日唔會主動搵你，咁佢好有可能有新對象，所以對你就冷冷淡淡，因為佢無咩精神同時間去維繫同你嘅感情。
又如果佢對你突然變得好熱情，可能係佢內心好內疚，想彌補你，衰啲嘅渣男就有可能係想同你上床。
偷食跡象4：記憶錯亂講錯野
一腳踏兩船其實都好考記性架，呢個女朋友鍾意食咩，嗰嗰女朋友又有咩興趣，一個時空交錯兼鬼拍後尾枕，就會講錯野。例如話上次去個間餐廳都幾好味，但其實無同你去過，又或者記唔到你哋之前講過咩、做過咩。
偷食跡象5：成日話好忙
男人看重工作我明白，但如果佢真係忙到無晒同你相處嘅時間，咁好有可能佢唔係淨係忙住工作。
打工仔OT好平常，但如果佢星期一至五晚都話要開工、要應酬、要同朋友食飯、要準備第二日返工嘅野，藉口多多總係無時間見你，就連星期六、日都唔得閒陪你，咁原因都呼之欲出啦。
立即訂閱接收Cosmo最新潮流資訊
訂閱電子報，獲得更多資訊、體驗及禮遇