戀人未滿 友達之上？4招教你升呢變情侶

楊丞琳自細教落：「曖昧讓人受盡委屈。」但偏偏現實入面，鐘意攪曖昧嘅人，數之不盡。咦，佢送我返屋企。咦咦，佢晚晚同我傾電話。咦咦咦，佢話掛住我。但係，點解只係朋友？點解佢遲遲唔同我表白嘅？ 若即若離估估吓咁都唔係辦法，教你以下四招，幫你段友情升呢做愛情，修成正果。

1. 確認對方係單身

男方遲遲唔開口表白，其實可能同感情狀況有關。建議問清楚對方有無拍拖，一，係fact check；二，係用黎打開話閘子，摸吓底，傾吓感情睇法，先知對方係想搵認真感情對象，定係friends with benefits。傾得興起，可能對方會打蛇隨棍上，即刻表白… …

2. 創造共同秘密及暱稱

有時男方唔行前一步，純粹因為sense唔到你都對佢有意思。所以你要比到男方一種「女朋友」嘅感覺。例如，互叫暱稱，創造多d得你哋兩個先知嘅共同秘密，愈行愈埋，愈黎愈親密，男方就會快D向你表白。

3. 以退為進

如果你感覺進展到7788，爭埋門一腳，不妨試吓以退為進。突然唔覆對方message或者覆慢D，若即若離，睇吓佢反應。如果對方大為緊張，你就成功在望啦。

4. 節日應約

去到最後一步，係表白，講得再精準D，係比個機會對方表白。呢D嘢望落容易，但其實都需要天時地利人和。建議係節日如聖誕節/情人節/白色情人節等等等應約，打扮得靚靚，萬事俱備，情到濃時，男方自然會有所表示。記住，女人係要有矜持，所以要主動地被動，識得製造機會，咁就惦晒。