世上最遙遠的距離：從曖昧到戀愛

好多男仔都會俾女仔批評，成日都同其他人曖曖昧昧但又唔表白，究竟係咪想收女兵？除咗某啲以Flirt人為樂嘅雄性生物之外，更多男仔害怕嘅其實係——食檸檬。
事實上，Flirty冇分性別，當曖昧發展到一定程度，但又好似未去到戀人階段，唔止女仔會開始產生懷疑，就連男仔都會自我審查：究竟佢係咪真係鐘意我？到底我其實會唔會係做緊兵？

相比起女仔，男人自尊心更強，相對就更膽怯更害怕失敗。喺愛情面前，我哋都需要有相當嘅勇氣先能夠突破愛情嘅關口。你哋又有冇遇過以下嘅難關呢？

1. 害怕被拒絕，想要進一步但又唔夠勇氣，唯有說服自己留於進可攻退可守嘅階段；
2. 其實自己都懷疑到底大家係咪相愛，唔敢下決定；
3. 大家可能處於尷尬關係，例如某一方可能認識對方嘅ex，令你哋要面對流言蜚語；
4. 如果太急於定義關係，反而可能會失去對方。你唔講，我扮唔知，停留於朋友嘅關係可能會比情人更長久。

曖昧好多時候都會悄悄地發生，反而係等到身邊朋友發現你哋有異於常人嘅互動，自己先會後知後覺。重新回想起來，原來自己已經暗暗地喜歡咗對方。如果你仲未知道自己有冇曖昧，不如睇下以下嘅例子啦！

1. 成日都借啲意搵對方幫忙，提高大家嘅關係、存在感，仲會作啲理由畀大家互欠人情，咁就可以持續幫忙啦！
2. 每日都要聯絡，就連係深夜都唔放過。試諗下，正常一個人好好地點會半夜send嘢畀同事？除非係單身嘅工作狂女上司，否則一定有陰謀！
3. 如果屋企發生特別事情，都會第一時間通知對方，那怕其實佢對事情冇幫助。
4. 如果對方同其他異性互動，會不自覺呷醋、咬牙切齒！
5. 兩人對話間有其他人唔明嘅秘密或暗號，大家都視對方為首席樹窿。
6. 就算身邊有其他人，都會無意中有親䁥肢體動作，例如摸頭、搭膞頭、吱肚腩等等。
7. 特別嘅日子，想同對方一齊度過，即使見一眼都開心。

以上種種曖昧例子，其實都只係冰山一角。由曖昧到戀人，可能只係相差一個表白距離，但如果錯失時機，呢個亦可能係世上最遙遠嘅距離！大家記得把握機會，唔好因為一時羞於啟齒而錯失幸福呀！