話說張大勇千辛萬苦從北京救出老婆，一廂情願以為兩公婆可以在香港開開心心生活，便心急，火速提出不如造人，眼神更流露出一片渴望或飢餓。
事實上，仍然失憶的Jessie仍然滿腦疑問，尤其一打邊爐，便想起曾經跟另一女子在火鍋面前肉搏。你知啦，身為一個香港人，好難避免打邊爐，而跟另一女子打大架，斷估也關男人事。唔通爭食手切肥牛或者雞子咩？
難以理解的隱瞞決定
好啦，Jessie問記憶沒有問題的老公，究竟之前發生乜事，個女子又係邊位。奇怪在，張大勇居然支吾以對，仲爆出金句：「失咗憶咪失咗憶囉，仲好，唔係件件事都有需要記得清楚。」換了你是Jessie，不會釋懷，只會更加迷惘。
完全唔明，上一輯，張大勇跟Jessie鬧分手，Carman乘虛而入，結果張大勇還是揀回舊愛，激到Carman趁二人火鍋之際去報仇。有乜事需要隱瞞呢？
又不是一腳搭兩船也不是召妓更加不是揀了Carman無揀Jessie，明明Jessie是勝利者，知道真相後只會更加清楚跟老公曾同度過漫長的歲月，難道會因為覺得對唔住第三者而内疚到申請離婚？咪玩啦，Jessie是人呀，有好勝心㗎。
連串隱瞞破壞關係
最好笑係連大勇跟Jessie的common friend都煞有介事地避而不談，好似榮恩衛斯理不敢談論佛地魔，或者香港高官避免說到六四。搞到Jessie更加走火入魔，晚晚發夢就夢到打邊爐遇襲事件。
呢個時候，點會有心情幫張大勇大肚佗仔無得食煙無得飲酒無得食魚生咁慘情，肯跟張大勇去進行讓自己有機會懷孕的動作，都算唔話得做足人妻本份啦。
