藍橘子專欄：戀人未滿的心動！往事只能回味的４個曖昧位

好多人都認為，拍拖最蜜甜最難忘嘅時刻，就係兩個人曖昧嘅時期。當時未正式成為情侶，有好多嘢都唔可以做，但你無時無刻都想更加接近佢，想表達自己心意。嗰個時候，會做出好多難以理解，甚至好傻瓜嘅事。呢啲往事只能回味，就算再做一次感覺都唔同晒嘅事包括有以下幾種：

　

1. whatsapp訊息妄想症

好驚對方發咗訊息嚟自己會miss咗，結果好似神經病咁，每隔一陣就望一望電話。有時見到對方『輸入中…』，個心已經小鹿亂撞。

2. 每朝morning call

明明教咗鬧鐘，自己亦唔係一個會唔知醒嘅人。但對方主動提出會準時morning call你，你當然點頭話ＯＫ。其實，每朝聽到佢把聲，真係幾sweet幾醒神。

3. 故意小性感

雖然未正式展開關係，但偶爾會去街食飯，總會悉心打扮一番，希望留個好印象畀對方。尤其係第一眼見到面，佢不自覺咁呆望住你笑出嚟，呢個表情真係記一世。

4. 趁機有身體接觸

睇戲會坐得好近，行路會不經意撞一撞你隻手，會拍一拍你背脊，摸一摸你個頭。曖昧時期每個動作，每句說話，都係一種暗示同試探。亦因為呢種試探式交流，令曖昧時期特別付人深刻。

不論男女，請好好珍惜呢段回憶，因為當你年紀大咗，做任何事都會「實際」咗。你發現自己身體唔適合曖昧，心態上亦唔識點樣去傻傻地向對方暗示自己心意。