藍橘子專欄：有做以下５大舉動，一定係絕世好男人！

要搵一個可以共渡一生嘅伴侶，就算唔係好有錢，都起碼搵一個錫你嘅人。「愛」唔係掛在口邊咁簡單，更加唔係送禮物就得。

一個真正愛妳嘅人，可以喺日常生活微細事物搵得到，就好似以下幾種絕世好男人咁。

１）行蹤有交帶

除咗Whatsapp唔可以求其應幾句敷衍了事，平時可以自動報告行蹤就最完美。只要唔係信唔過男人，只要簡單講聲會去邊度，同邊個去，女仔就會好放心。

２）去睇戲帶頸巾

落雨記得帶遮係好正常，因為兩個人都需要用到。但知道戲院冷氣凍，識得帶條頸巾放背囊嘅人又有幾多呢？當拎條頸巾出嚟嗰一剎那，一定好感度加滿分。

３）負責諗晚餐食乜

諗去邊度食飯係史上最苦惱嘅問題，但最憎聽到「無所謂」呢個答案，其實女仔唔係嫌三嫌四，只係呢個世界有95%女仔都有選擇困難症。

４）記得妳著咩衫

男人鍾意望靚女可能係天性嚟，但奇怪嘅係…好多男人就算陪女朋友行咗一日街，都唔記得女朋友今日著咗咩衫，返到屋企同佢講電話已經忘記得一乾二淨。留意到女仔著咩衫，係一種暖心表現。

５）冬天提供人肉暖蛋

世上最暖嘅地方，就係男朋友背脊或肚腩。雖然唔係人人都受得住嚴寒，但出街凍到手都僵嘅時候，真係好想塞隻手入去男友背脊或肚腩。